Gobernacion ta continuacion caminda bou di ningun circunstancia, por tin argumento valido pa hustifica e hecho cu a manda 200 mama y tata di famia cas, sin entrada y sin perspectiva por lo pronto pa atende cu nan obligacionnan financiero.
Esaki lider di fraccion di AVP, sr Marlon Sneek a trece dilanti den e programa di Noticia Cla den cual programa a atende cu varios tema cu a ser discuti recientemente tanto di parti di partido AVP como di parti di Gobierno.
Argumento di Gobierno cu e retiro di e grupo grandi di hende aki a tuma luga pa motibo cu ex Prome Minister Mike Eman no a regla e posicion di e trahadonan aki, ta ser considera un argumento fofo y ridiculo di parti di Parlamentario Marlon Sneek, kende ta mustra den forma enfatico, cu “gobernacion ta continuacion” y bou di ningun circunstancia un gobierno cu ta propaganda constantemente cu e “hende ta central” den su maneho, ta bira haci e cos aki.
No tin hustificacion y busca argumento cu sea ta trata di hendenan cu mester a bay cu gobierno ora cu el a bay cas, of cu no a regla nan posicion huridico na tempo, no por kita for di e hecho cu mas cu 200 famia rond Aruba, ta confrontando problema serio financiero den proximo luna y hasta añanan, pa motibo di e medida sin piedad aki di Gobierno di MEP-POR-RED.
Ta di lamenta cu tin politiconan cu tur dia ta papia cu e ser humano ta central pa nan, awe ta busca tur excuus posibel pa trata di hustifica un decision asina cruel y sin compasion y aki sr Sneek a mustra cu mayoria di e hendenan aki a ser poni na unda tin un vacatura existente y caminda e proceso pa realisa e decreto gubernamental, no a keda cla ya cu tin ora esaki por bay lihe y tin ora esaki no ta bay lihe manera mester ta.
Trahadonan cu dos of tres aña pasa a wordo ubica na cierto departamentonan cu a wordo forma pero caminda e proceso no a wordo completa y awor ta pasa machete den esakinan y manda tur hende cas cu pa sr Sneek y partido AVP, ta persecucion politico sin duda.
E hecho cu Prome Minister Evelyne Wever Croes ta reta partido di AVP pa bin cu prueba cu ta trata aki di persecucion politico, Marlon Sneek a mustra den forma cla cu ta imposibel pa acepta un reto di un Prome Minister y politico, cu nunca ta para pa loke e ta bisa y nunca ta haci loke e ta bisa cu e lo haci.
Sr Sneek a mustra cu tur hende por corda e declaracion contundente di e lider di MEP kende durante di e proceso di formacion di su gobierno, a bisa cu partidonan cu kier trata cu MEP, mester acepta cu nan lo bay bek na 7 Minister pero na final di cuenta a pone su posicion un banda y a acepta 8 Minister mientras cu uno a bay di carambola y awor a crea e posicion di ‘Staatssecretaris’ pa acomoda otro Minister den e gabinete di dje.
Lider di fraccion di AVP a mustra cu ningun momento Prome Minister por hustifica 8 Minister cu e hecho cu MEP no a haya mayoria ya cu su declaracion haci na medionan di comunicacion riba e cantidad di Minister, a sosode despues di eleccion durante di e proceso di formacion.
Un politico cu no ta respeta su propio posicion cu e tuma, cu ta bisa un cos y haci otro, ta dificil cu lo por acepta un reto for di dje sigur ora cu e mes cu na varios ocasion, hasta despues cu su gabinete a huramenta, a pone enfasis riba e hecho cu su gobierno lo tin e “hende central” pa algun siman despues manda 200 hende, mama- y tatanan di famia, como parti di e campaña di persecucion politico di su gobierno.