e cuido di esnan mas vulnerabel den un pais ta un refleho di ki tipo di gobierno nan tin, asina lider di partido di pueblo arubano (avp), mr. mike eman ta accentua den un declaracion di prensa den cual e a lamenta e mas reciente deterioro social-economico cu e ta constata den hogarnan di nos pais. gabinete wever-croes ii ta causando un pobresa penoso cu ta haci cu miles no por yega na e necesidadnan basico.  

e pensamento cu eman a cita riba cuido di esnan mas vunerabel ta di mahatma gandhi. eman ta considera cu ta uno cu ta mustra riba e ki tipo di gobierno no ta percura pa esnan mas vulnerabel den comunidad. lamentablemente awe aruba ta experiencia un gobierno cu ta neglisha e tarea esencial aki di cuida esnan mas vulnerabel. avp kier remedia esaki di un forma mas definitivo atraves di ancra den nos constitucion e derecho ariba un existencia husto. p’esey nos a anuncia cu lo tuma e iniciativa di introduci e garantia aki den nos constitucion pa tur cuidadano.

e lider di partido y di fraccion di oposicion a uza como ehempel articulo 20 den constitucion di hulanda cu ta bisa: “de bestaandszekerheid der bevolking en spreiding van welvaart zijn voorwerp van zorg ter overheid.” pues gobierno tin e obligacion constitucional pa garantisa un existencia husto pa esunnan mas vulnerabel. e esencia di ancra e derecho aki den nos constitucion ta crea un responsabilidad y un tarea constitucional pa gobierna pa hasi un esfuerso continuo pa garantisa cu tur ciudadano por tin suficiente entrada pa por cubri e gasto nan minimo pa por tin un calidad di bida confortabel. eman ta bisa tambe cu den eleccion na hulanda na e momento aki ‘bestaanszekerheid” ta tema central. ta hustamente e insituto sociaal cultureel planbureau scp di hulanda cu ta haci “politiek den haag” conciente cu hulanda no ta cumpliendo debidamente cu e articulo aki, mirando cu mas cu 1 miyon hulandes ta pasando den momentonan hopi dificil. esaki ta accentua e nececidad tambe di un sociaal cultureel plabureau aruba scpa. 

e derecho ariba existencia digno ta pertenece na e derecho nan humano mas fundamental, pa motibo cu e ta duna contenido na e principio cu cada ser humano tin balor. un pueblo mester ta sigura di necesidadnan basico y minimo manera alimentacion, educacion, utilidad, transporte, cuido medico y vivienda. e ta un garantia constitucional cu avp ta bay crea pa nos comunidad cu ta brinda proteccion contra pobresa y garantia di un calidad di bida decente. 

“si salario minimo no ta yega, si no ta ahusta pensioen suficiente, si ta kita remedi di nos grandinan, si ta kita placa for di anciano, si ta pone costo di bida inalcansabel, ta neglishando e derecho riba un existencia husto,” asina eman a expresa durante su declaracion. 

eman: “ta bira tempo pa nos por cuadra legislativamente mas fuerte e derecho cu un ciudadano tin riba proteccion riba su existencia minimo den constitucion di pais aruba y esey ta un di e iniciativanan cu nos ta bay tuma, conseha pa nos hobennan hurista, cu nos tin cu ta asesora fraccion di avp.” eman a menciona aki specificamente jurista wendrick cicilia cu ta avansando su estudio riba e tema specifico aki.

mr. mike eman a enfatisa cu avp ta bay lucha pa crea e base legal constitucional pe e derecho ariba existencia husto pa cada ciudadano. esaki ta garantisa cu e calidad di bida di nos ciudadanonan no por deteriora pa motibo di maneho of decision di un gobierno sin conocemento, alma of curason. 

Despues di a presenta e mocion na Parlamento di Aruba, Partido di Pueblo Arubano (AVP) ta empuhando e introduccion di un asina yama Sociaal Cultureel Plan Bureau mescos ta existi na Hulanda caba. E siguiente paso ta pa hiba un dialogo nacional y den cuadro di esaki a tene un reunion e siman aki cu Mediador di Gobierno, Sr. Anselmo Pontilius. “Un persona di su conocemento y experiencia den desaroyo nacional por contribui di un forma valioso na e concepto aki, pa cual e lider, mr. Mike Eman, ta hopi gradicido .

Compaña pa John Hart y Wendrick den nan calidad di miembro di e fundacionnan Mito Croes y Digna Lacle Herrera, Eman ta splica cu no ta suficiente pa tin un Caft cu ta haci calculacion di presupuesto, pero den e dialogo cu Hulanda falta un bista mas amplio di tur e factornan cu ta influencia e calidad di bida di nos hendenan; kico ta e oportunidadnan pa expande economia, mehora entrada pa ciudadano, con por garantisa miho cuido pa nos grandinan, con ta bay atende cu e tema di vergrijzing, etc.

AVP ta haya cu ta hopi importante pa bin cu un vision nobo cu por trece Aruba bek den harmonia cu Reino. Ta cumbini nos pa Hulanda tin un bista mas amplio di kico tur ta afecta e calidad di bida di nos hendenan y tin influencia riba e desaroyo di nos pais y e oportunidadnan cu Aruba tin. P’esey a bin cu e proposicion pa introduci un Social Cultureel Plan Bureau hunto cu Hulanda cu ta haci estudio riba tur tema cu ta afecta e calidad di bida di e ciudadano y nan oportunidad di desaroyo.

“Ora cu gobierno tuma medida, cu tin un calculacion di kico ta e efecto pa e ciudadano. Ora cu bo bin cu un BBO na frontera, con e ta impacta e costo pa comercio, con e ta afecta e poder di compra di e ciudadano, con ta afecta enseñanza di nos muchanan. Tur e temanan aki nos ta mira ultimo tempo cu ta tuma decision cu un facilidad, simplemente basa riba rekensom. Ta aumenta e peso riba nos ciudadano, pero no ta calcula e impacto. Ta importante pa Hulanda tambe tin riba su “netvlies” e informacion cu un Social Cultureel Plan Bureau por trece,” e lider di AVP a comenta.

E delegacion di AVP a conclui e reunion cu Anselmo Pontilius hopi satisfecho. Na opinion di John Hart, a resalta e importancia di dialogo ya cu ta algo cu mester continua pa eleva e manera colectivo di pensa. “E ta trece perspectiva nobo y ta mantene gobierno y parlamento, stakeholders skerpi pa tene nan bista riba loke ta importante. Cifra ta importante, pero tambe e sentimento cu ta biba den pueblo,” Hart a indica, p’esey e ta kere cu un Social Cultureel Plan Bureau ta agrega un balor, “e parti di kico ta welvaart y welzijn. No ta solamente cu un presupuesto mester klopt, pero tambe e sentimento y nececidadnan cu ta biba den pueblo,” el a agrega.

Di su banda, e candidato hoben Wendrick Cecilia ta considera importante pa profundisa e discusion cu ta hiba actualmente. Ta scucha tocante un Raft, supervision financiero externo, presupuesto, tur ta terminologia importante den cuadro di finanzas publico, pero importante ta tambe e impacto social economico cu persona ta bay enfrenta den nan bida diario a consecuencia di decisionnan politico. “Pa crea e balansa entre e argumento financiero y e impacto social economico, Sociaal Cultureel Plan Bureau ta necesario den e discusion aki.”, Wendrick Cicilia a envatisa. “No solamente mester wak si e kolom financiero ta cuadra, pero por wak tambe e impacto riba e bienestar di nos pueblo. E balansa cu e instituto aki ta bay crea den e prioridadnan cu no mester pone ta hopi importante,” asina Cecilia a conclui. Eman, Hart y Cicilia a envatisa tambe cu lo continua cu e dialogo aki acercando diferente organisacion.  

E parlamentario di Partido di Pueblo Arubano (AVP) a hay’e ta atende cu peticion di varios medio y ciudadano pa un reaccion riba e declaracion haci recientemente door di Prome Minister Evelyn Wever-Croes rond di e scandal di e helicopter na servicio di Cuerpo Policial Aruba. Dowers ta di opinion cu atrobe e minister president ta purba di tira santo de wowo di pueblo papiando cos cu no ta cuadra y puntando dede riba gobiernonan anterior basa riba puro mentira. P’esey mes diamars mainta el a reta Premier Wever-Croes pa debati y compara resultado di tempo cu e tabata minister di husticia y awo.

Para dilanti di e hangar di base di Cuerpo di Bombero na aeropuerto, e parlamentario a expresa di tabata sorprendi pa scucha su nomber den boca di e prome minister pa loke ta tangana cu gobierno ta aden aworaki. Di otro banda, Dowers ta compronde cu Gabinete Wever-Croes I y II no tin logro propio pa gaba su mes ta aden. Esaki ta pone cu, te hasta e acuerdo cu un traficado di droga cu a entrega su mes na DEA, nan lo sali y bisa di ta masha orguyoso di dje.

No por gaba cu e deal di Eagle LNG pasobra esey ta un macutu cu ainda tin pa wak cuanto puyito lo sali fo’i dje y cuanto e lo costa pueblo. Esun di Citgo si tur hende sa cu Aruba a perde di ricibi 300 miyon florin, ademas di core riesgo cu lo mester saca mas, a pesar cu un hende yega na partido si a gana bon pida cen cu e acuerdo aki. P’esey tambe ta facil, segun Dowers, pa compronde e ansha di morto cu tabatin e tempo aya pa firma e deal aki di helicopter.

E tempo ey, hopi hende a reclama y bisa cu nan no a haya un oportunidad husto pa presenta un oferta pasobra for di prome instante gobierno a bisa caba ta ken lo haya e contracto. E amor grandi ey a keda demostra e siman aki atrobe den e rapidez cu ministernan a sali publicamente na defensa di e compania. Cualkier otro organisacion cu a cera un deal cu hende meti den droga, por lo menos lo a warda un par di dia di investigacion prome pa wak kico ta kico y no djis bisa cu e helicopter mester sigui keda bula.

Wever-Croes ta acusa Dowers di para tur asunto di helicopter ora el a asumi e responsabilidad e cartera di husticia. Sinembargo, Dowers a topa cu un contracto andando y ora cu esey a caba, e compania tabata pretende di haya un extension sin destaho publico, pasobra esey ta e manera con e gobierno anterior di MEP a hacie. Como cu tabatin 1 miyon florin presupuesta pa helicopter y no a haya un oferta bou di 1.2 miyon florin, Dowers a opta pa hinca e recursonan directamente den Cuerpo Policial Aruba, loke a resulta den un avance considerabel di nan operacion.

Dowers: “Evelyn Wever-Croes ta gaña un bes mas cu ta e helicopter a soluciona criminalidad na Aruba. Loke ta soluciona crimen ta polis. Mi a bin haya un KPA demoralisa loke ta pasando aworaki atrobe. Mi a pone mas cu 100 polis na trabou cu ta trahando ainda y ta nan ta combati y preveni crimen, no helicopter. Fuera di esey a aumenta castigo pa atraco y posesion di arma; esey ta loke ta reduci y preveni crimen, no un helicopter cu ta costa 10 miyon florin di pueblo; 10 miyon florin tira afo.”

Na su opinion, mando policial a haci masha bon di bisa cu tanten no tin claridad, e helicopter no ta bula. Minister Tjon, na luga di para tras di integridad di su cuerpo policial, a defende e compania stranhero cu storia pasobra ningun compania serio ta manda un marketing manager pa firma un contract di 10 miyon florin. 

“Fiesta di narcotraficante tin riba e isla aki. Evelyn Wever-Croes y Andin Bikker a corta nanishi pa daña cara di Cuerpo  Poicial y di Aruba,” el a expresa retando e prome minister pa trece e cifra cu ta mustra cu di dia cu e helicopter ta bula, crimen a baha. “Cualkier dia nos por debati riba kico boso a laga, kico nos a haci. Bin cu lista y bisa cua crimen e helicopter aki a soluciona y mi ta bin cu lista di cua polis a soluciona cua crimen y si ta abo a nombr’e of ta ami a nombra nan” asina e parlamentario di oposicion a finalisa bisando.

Dialuna mainta e parlamentario y exminister di energia tambe tabata dilanti di oficina di N.V. Elmar pa sostene un grupo di ciudadano cu a bay demostra nan malcontento pa e echo cu Gabinete Wever-Croes II kier saca 15 miyon florin for di e companianan di utilidad. Pa de Meza, esaki ta inaceptabel ya cu a aumenta e tarifa di awa y coriente for di aña pasa cu awe costo di bida a bira impagabel pa pueblo.

Riba lomba di e humilde ciudadano e companianan di utilidad a haya un entrada adicional di mas cu 100 miyon florin.

E parlamentario a cuminsa na confirma di un manera mas amplio, loke su colega y lider di partido, mr.  Mike Eman a menciona anteriormente, esta cu entre 2001 y 2009, gobierno di asignatura di MEP a saca miyones for di e companianan di utilidad, creando un instabilidad financiero cu a pone nan existencia na peliger.

T’asina cu durante Gabinete Oduber III y IV, e gobierno di MEP a chica 252 miyon florin for di WEB y ELMAR. Pa Mike de Meza “Ta incomprendibel cu awe atrobe e mesun partido MEP, pero awor bou liderazgo di Evelyn Wever-Croes ta bolbe chica e companianan aki”. Ya pueblo ta harta y ta sclama cu no por mas!

“Si bo mira prijs di gasolin y diesel, ya gobierno aki a saca casi 100 miyon florin adicional for di accijnzen y di BBO, den menos di 7 aña. Tempo cu AVP tabata den gobierno, no a ni mishi cu accijnzen y hasta reduci BBO. Manera cu MEP a drenta gobierno, a aumenta accijnzen cu entre 10 cen y a redobla BBO.

E ingeniero di profesion a splica cu si tuma na cuenta cu WEB tambe a introduci e motornan Recip adicional, cu ta representa un spaarmento den consumo di combustibel di casi 1000 bari menos pa dia, ta ekivalente na otro 40 miyon florin menos di gasto. Pero keto bay ta castiga e humilde pueblo na man di e gobernantenan actual.

“Asina mes, te dia di awe pueblo no por mira un rebaho den su costo di bida. Esaki ta abuso inaceptabel di e gabinete, Evelyn Wever-Croes” de Meza a expresa mientras e ciudadanonan rond di dje tabata sclama cu e placa aki ta bay den saco di e mandatarionan actual.

Den conclusion, colega di partido Mike Eman a indica cu hopi di e ciudadanonan disgusta cu a presenta na Elmar dialuna mainta a mustr’e nan recibo di awa y coriente, contando con algun ta hende di edad avansa y cu den e dianan aki di calor y pa motibo di salud fragil no tin otro opcion cu haci un consumo halto di coriente pa cende airco, mientras ta ansha pasobra nan sa cu despues tin cu paga un recibo pisa.

Den prome ora di dialuna mainta lider di Partido di Pueblo Arubano (AVP) Mike Eman a para hunto cu un grupo grandi di ciudadano dilanti di edificio di ELMAR pa protesta e plannan di Gabinete Wever Croes pa ranca 15 miyon flrin for di ELMAR y WEB. Nan ta sinti cu no por keda keto mas pa e manera con Gabinete Wever-Croes II kier plunder Pais Aruba y su companianan pa sigui cu nan abusonan y sigui beneficia nan mes. Para dilanti di sede di N.V. Elmar na Playa, lider di AVP cu un grupo di ciudadano a demostra cu documento y recibo den man, pakico nan y pueblo tin tur motibo di ta disgusta cu e gobierno di MEP y RAIZ. Esaki ta e mes un sentimento cu, te hasta, e propio Raad van Advies, ta expresa relaciona cu e intencion di gobierno di saca 15 miyon florin for di e companianan di utilidad WEB y ELMAR.

“E pueblo Arubano a bin para pasobra nan ta cansa, nan ta disgusta,” asina Eman a cuminsa na bisa. Ela sigui bisa: “E momento a yega pa pueblo bisa ta basta.” Raad van Advies mes ta cuestiona y condena gobierno formalmente. E entidad oficial aki a expresa su repudio despues di a tuma nota cu den presupuesto 2024 Gabinete Wever-Croes a pone un “winstuitkering” di Utilities Aruba N.V. na balor di 15 miyon florin. “Winstuitkering” ta e capa bao di cual gobierno ta ta bai saca 15 miyon for di ELMAR y WEB. den presupuesto.

Mr. Mike Eman a puntra su mes ta con un gobierno por tin asina poco cuer’i cara pa laga hende grandi den dificultad pa paga nan awa y coriente; laga famia humilde den situacion cu mester scohe si ta pone pan riba mesa of paga e recibo di utilidad y riba dje bay ranca 15 miyon florin for di caha di WEB y Elmar. Esey ta un echo cu tambe Raad van Advies ta cuestiona. Den nan carta pa gobierno y parlamento, Raad van Advies ta indica cu “Tanto cerca Water en Energiebedrijf Aruba N.V. y N.V. Elmar na augustus y september 2020, e tarifa pa consumido di awa y electricidad a aumenta fuertemente”. Tocante di esaki Mike Eman a declara: “A bisa cu ta bay bah’e, pero te dia di awe ta djis un crenchi ela baha. Ainda pueblo ta bibando cu e aumento exorbitante cu Gabinete Webver Croes a impone riba pueblo. Nos ta bibando cu un gobierno cu ta chicando nos pueblo cu redoblacion di BBO, cu un BBO di 7% na frontera, cu un aumento di schoolgeld, cu pago di remedi. Medida tras di medida cu ta haci imposibel pa nos ciudadano por biba. Tambe e famianan di clase medio. Negoshinan chikito no por sobrevivi pasobra costo di haci negoshi a bira impagabel. Pesey tur dia mas ta haya nan ta cera nan porta.”

Riba dje ta mina e viabilidad di y confiansa den e companianan estatal di utilidad. Esaki a keda refleha ora cu e lider di AVP a lesa textualmente for di e carta di Raad van Advies caminda nan ta bisa: “Raad ta puntra su mes, den e cuadro aki, con lo ta posibel e ora ey pa Utilities Aruba N.V. tin e espacio financiero pa un winstuitkering.” Cu otro palabra, si a hisa e prijs pa yuda e companianan estatal cu tabata falta placa, con por ta posibel cu awor ta exigi e mes un companianan pa duna gobierno 15 miyon florin? E 15 miyon aki ta bai den mesun “black hole” unda cu 1.5 biyon extra di entrada di Gabinete Wever Croes a bai. Ningun hende sa unda e 1.5 biyon aki a bai. E ta e pregunta grandi den pueblo: unda e 1,5 biyon extra di entrda cu Gabinete Wever Croes a cobra na medida di 2017 pa 2023 a bai ?

Costo di bida halto, perdida di poder di compra, cost of doing business aumentando, inversionan priva reduciendo, diferencianan preocupante den reparticion di entrada, pobresa y fragmentacion di famia, Aruba den un deterioro fysico y social, tur ta retonan grandi cu Aruba ta enfrentando. “Den un tempo cu retonan complica ta keda influencia nos desaroyo e nececidad pa guia confiabel y conocemento ta bira di esencial importancia. E solucionnan mester ta basa riba estudionan scientifico amplio y profundo. Nos no por traha cu un solo set di cifra isola for di un cantidad di otro realidad y factornan den comunidad. Nos mester un “dashboard” completo di informacion pa por fiha maneho y tuma decision”, e lider di fraccion di AVP, mr. Mike Eman a expresa. 

E propuesto pa institui un Sociaal-Cultureel Planbureau Aruba (SCPA) ta hunga un papel crucial den e vision aki. SCPA lo funcciona manera un entidad di investigacion scientifico independiente cu ta analysa, investiga, y rapporta cuestionnan sociaal-economico y comunal di un manera basa riba fundamento scientífico. Esaki no solamente ta trece un comprendemento profundo di e cuestionnan aki, pero tambe ta provee un “dashboard” amplio di informacion confiabel y profundo na na nos comunidat, Eman ta splica.

Pa nos logra un acuerdo nacional riba e cambio di rumbo cu nos Pais mester bai pa sali for di e situacion preocupante cu e ta aden nos mester dialoga. Nos mester hiba e dialogo aki basa riba informacionan amplio y profundo cu nos mester analysa cu participacion di profesionalnan scientifico. Pesey un Sociaal Cultureel Planbureau Aruba ta urgentemente necesario, mr. Mike Eman ta accentua. 

“E confiansa den sciencia, man den man cu un bista cla di e realidadnan cu ta biba den pueblo, lo tin e credibilidad cu ta necesario pa crea un sosten nacional pa cambio di rumbo. Cu e “dashboard” di informacionan cu un SCPA por provee nos lo tin datosnan imparcial, profesional cu cual nos por tuma decisionnan huicioso”. 

E lider di fraccion di AVP, mr. Mike Eman, cu a dirigi como Promer Minister dialogonan asina profundo, cu datosnan profesional, ta subraya e valor di un Sociaal Cultureel Planbureau Aruba, manera nan tin planea den nan proposicion. “Nos propuesto pa institui hunto cu Hulanda un Sociaal-Cultureel Planbureau Aruba (SCPA) ta crucial pa provee un “dasboard” completo di informacion scientefico pa nos por traha pa e BON COMOUN di Aruba henter. Un solo set di cifra, isola for di un cantidad di otro realidad y factornan den comunidad, no ta suficiente. Nos mester un “dashboard” completo di informacion confiabel pa por fiha maneho y tuma decision pa determina un rumbo di cambio positivo pa Aruba.

Manera Semper partido di Pueblo Arubano AVP a anuncia, den luna di September awor lo cuminsa yuda yena formularionan riba entradanan pa belasting. Manera tur aña lo duna e servicio aki na Cas di Partido Playa. E fechanan cu lo duna asistencia na Cas di Partido ta: dianan 19 y 26 di september, 3, 10, 17, 24, y 31 di oktober, 7, 14, 21 y 28 di November. E horario ta entre 7pm pa 9pm. 

Riba tur e anochinan aki lo tin un grupo di experto pa yuda yena e formularionan. Di e forma ey, mescos cu tur aña, ta bini cla lihe y por yuda hopi hende. 

Ta corda tur hende pa bini prepara cu tur documento necesario. Esaki ta e documentonan cu por tin mester di dje:

e formulario pa yega e entrada pa belasting cu bo a haya na cas;

e resumen di bo entradanan den e aña 2022. Bo por haya esaki di bo doño di trabou of e compania unda bo ta traha. Si bo ta un pensionado bo ta haya esaki di SvB of di APFA;

un resumen of comprobante di tur otro entrada cu bo a haya na 2022;

e comprobante di e interes cu bo a paga na banco riba credit card of riba fiansa cu bo tabata paga na 2022;

comprobante di tur gasto adicional pa cuido medico di bo of un familiar cu ta depende di bo.

comprobante di gastonan haci pa estudio di bo mes of un familiar cu ta depende di bo;

comprobante di gastonan cu bo a haci pa cuido di un familiar serca.

comprobante di otro gastonan irregular of inusual cu bo mester a haci na aña 2022.

Porfavor trece tur esakinan ora bo bin pa yena e formulario di belasting serca nos y bini cla lihe.

Den nos archivonan di Partido AVP nos por a haya un articulo di Amigoe di 24 di Februari 1967 caminda por a constata cu ya di e tempo ey e partido tabata juda nos pueblo cu temanan di belasting. Den e articulo aki den Amigoe ta relata cu líder di fraccion di AVP, C.A, (ShonA) Eman, a compila un “bezwaarschrift” cu mas di 300 ex empleado di Lago a firma. E “bezwaarschrift” cu e abogado di pueblo Shon A Eman a compila e tempo ey tabata opone e belasting cu gobierno tabata cobra empleadonan di LAGO riba nan “Lay-off Allowance”. Promer Shon A Eman a haci pregunta parlamentario na Minister di Finanzas pa rectivica e inhusticia aki. Ora e no a haya contesta Shon A Eman a redacta un “bezwaarschrift” cu mas di 300 empleado a firma pa no worde cobra belasting riba nan “Lay-off Allowance”. Locual Shon A Eman a bringa pe e tempo ey awe a desaroya den e tarifa special di belasting cu empleadonan ta bini na remarca pe ora un grupo pareuw perde trabao y haya un suma di compensación pa anjanan di servicio. E jiu di mas hoben di Shon A Eman, Mike Eman awe ta bisa cu den e mesun espirito ey nos ta sigui juda nos pueblo pa haya un trata husto.      

Tras e ceremonia protocolario pa cu apertura oficial di aña parlamentario nobo, miembro di fraccion di Partido di Pueblo Arubano (AVP), drs. Mervin Wyatt-Ras a comparti su reaccion na e discurso presenta door di Su Excelencia Gobernador Alfonso Boekhoudt comentando cu e no a scucha suficiente tocante e retonan cu Aruba ta confronta den sector social. Manera ta conoci, e discurso ta uno di maneho Gabinete Wever-Croes II.

E parlamentario a tuma oportunidad pa felicita tur miembro di su fraccion y otronan, como tambe esunnan independiente, ademas di e personal di parlamentario. A gradici nan pa e sosten grandi na e operacion di Parlamento y invita su coleganan pa haci un trabou cu Aruba por ta orguyoso di dje.

En berdad e discurso a menciona con e poder di compra di e ciudadano Arubiano a disminui y con e situacion economico ta mas dificil. “Esey nos ta sintie tur dia y ta bon cu el a trece dilanti, sinembargo mi ta haya toch falta pa trece dilanti kico gobierno ta bay haci pa atende cu e parti social,” asina Wyatt-Ras a comenta. 

Aunke a papia tocante e parti di salubridad cu sigur ta keda un punto di atencion pa nos comunidad, no a mustra con ta bay yuda nos hendenan mas den e area social; bin cu algun alternativa. Di otro banda, loke Wyatt-Ras ta di acuerdo cu ne ta cu, como pueblo, nos mester lucha pa integracion di nos ciudadano, ademas di salvaguardia nos derecho democratico.

E ultimo aki ta netamente loke na e momentonan aki no di gaba di parti di gobierno. Y aunke Presidente di Parlamento ta haci echo di e mensahe pa uni y sali defende nos derecho, Wyatt-Ras ta kere cu e no mester keda na palabra so, pero den e practica y ehempel cu ta duna. Pa e parlamentario di AVP, ta su mas 20 aña den parlamento y ta hopi consciente di e responsabilidad aki. E ta lamenta cu Minister di Finanzas y Cultura, Xiomara Maduro no a duna acto di presencia na e ceremonia importante aki.

“Ban percura pa Hulanda tambe mira e necesidad di nos pensionadonan, mira e necesidad di esnan di menos recurso den e pais aki, mira e necesidad di e inversionistanan di e pais aki pa crece y ki oportunidad nos por duna nan pa crece,” e lider di Fracion di AVP, mr. Mike Eman a expresa den presentacion di e mocion pa yega na un Sociaal Cultureel Planbureau Aruba hunto cu Hulanda.

“A yega e momento pa nos por habri combersacion cu Hulanda, no riba RAFT of CFT, pasobra esey ta gepaseert station, en realidad nos tabata tin un LAFT caba ta Gabinete Wever-Croes a bay torno na dje”, Eman a indica.

Supervision financiero kier men cu Aruba tin control riba su presupuesto, basa riba norma cu ta controla door di CFT. CAFT tabatin su base legal cu Aruba mes a traha na 2015. Gabinete Wever-Croes II a bay torno na dje y esey a pone Hulanda awo ta desconfia y kier hinc’e den un RAFT. 

Eman: “Nos por discuti henter dia riba e tema ey, pero señora Evelyn Wever Croes ya a firma pa esey y nos ta mira den tur e cartanan cu Aruba no tin mucho posicion pa negocia paso Hulanda tin un desconfiansa hopi grandi.” 

Hulanda ta na bispo di eleccion cu partidonan cu diferente perspectiva riba e isla y pa Aruba ta importante pa gara e momento aki pa mira si, banda di atencion pa presupuesto di pais Aruba, habri un combersacion tambe riba e situacion social economico di nos hendenan. Eman a enfoca.

P’esey fraccion diu AVP a presenta un nocion cu ta pidi pa instalacion di un Sociaal Cultureel Planbureau mescos cu Hulanda tambe tin. Sociaal Cultureel Planbureau no ta mira unicamente cifranan di finansas, pero ta mir’e den contexto di un desaroyo social economico caminda cada posicion di e ciudadano pa nan calidad di bida ta den contexto. Asina ta bay midi efecto di cada medida; no djis cuanto placa e ta trece den presupuesto, pero kico e impacto ta riba nos Pueblo. 

Si ta corta den AZV, kico e efecto ta riba salud? Si ta subi schoolgeld, kico e efecto ta riba e enseñansa di muchanan di menos recurso? Si ta aumenta e cost of doing business, kico e kiermen pa inversionista? Nos por a mira cu hopi anja Hulanda no a realisa e pobresa cu tabata tin na Boneiro of no a duna atencion na esaki, apesar cu desde 2010 Hulanda ta co-responsabel pa e Pueblo di Boneiro. Ta te ora cu rapportnan a cuminsa sali di Ombudsman di Hulanda y di Sociaal Culreel Planbureau y Unicef di United Nations ariba pobresa na Boneiro y situacion alarmante di muchanan e ora ey Hulanda a cuminsa mira e aspecto socio economico di Boneiro. “Pesey nos ta kere cu un Sociaal Cultureel Planbureau ta necesario banda di CAFT”, mr. Mike Eman ta accentua.    

“Cu e mocion aki pa institui hunto cu Hulanda un Sociaal Cultureel Planbureau fraccion di AVP kier pone e “bigger picture” visible pa Hulanda tambe. E momento ta awo, Hulanda tin eleccion, partidonan cu diferente pensamento mustrando interes pa nos islanan. Nos ta kere cu nos tin cu gara e momento aki cu e vision cu fraccion di AVP a presenta awe den e mocion,” Eman a clausa bissando.

“Na unda cu nos yega den barionan di nos Pais ta e mescos nos ta tende y scucha; nos Pueblo ta sinti nan mes abandona y lubida dor di Gabinete Wever Croes”, e lider di fraccion di AVP, mr. Mike Eman, a expresa den fin di siman despues di tabata den diferente bario di Aruba ta bishitando y scuhando ciudadanonan.

UN PUEBLO ABANDONA

Por constata esaki den e clamor di nos hendenan, pero tambe den e deterioro den barionan cu ya mas no ta worde manteni. Hopi ta e barionan caminda renobacionnan grandi a worde haci durante nos gobernacion y ora mi pasa awor ta constata cu ni foyo y yierba seco e gobierno aki por kita. Sushi ta acumulando den tur skina di nos pais. Tambe Eman ta mustra cu e canchanan deportivo cu a traha pa diferente bario y clubnan durante su gobierno e gobierno actual tin nan totalmente neglisha. Mi ta mira e hekinan ta bin abao, e luznan ta kibra y foyo y sushedad ta apodera di tur e ambiente rond di e facilidadnan aki cu a worde traha pa hobennan por tin lugarnan positivo di recreo.

UN PUEBLO LUBIDA

Tur famia cu mi bishita y reuni cune ta sclamado e mesun dolor. Nos pueblo ta pasando un amargura inacceptabel. Miles y miles ta bibando den un pobresa alarmante. E cosnan di mas basico a bira imposibel pa asina tanto famia. Y awor nos a haya otro medida cu ta e 7% BBO na frontera”, e lider di oposicion, mr. Mike Eman a expresa cu hopi preocupacion. Nos mamanan cu ta biba diariamente cu e preocupacion di falta di placa, cu prijsnan aumentando drasticamente y un acumulacion di debe ta esnan cu mas ta sufri di e pobreza creciente na Aruba. Eman ta bisa. Tur esaki tambe cu presion grandi riba e nucleo familiar y cu hopi vez ta conduci na fragmentacion di hogar y hobennan desorienta. Y den tur esaki Gabinete Wever Croes tin e pueblo lubida.

7 AÑA LUBIDA Y ABANDONA

50.000 CIUDADANO SUFRIENDO 

BAO DI BESTAANSMINIMUM

E ta bai bira exactamente 7 aña cu nos Pueblo y Pais ta biba den e abandono aki bao di Gabinete Wever Croes. CBS ta mustra den un tabel e diferencia entre 2022 y 2017 cu ta mustra con bao di Gabinete Wever Croes e deficit di un persona cu salario minimo (Afl. 1815) den comparacion cu e bestaansminimum pa un persona (Afl. 2528) a crece te na un defict mensual di 713 florin. Segun e cifranan di CBS e deficit aki a practicamente redobla den e añanan di Gabinete Wever Croes. 25.765 persona tin un salario bao di 3000 florin. Miles no por sobrebibi si nan no traha dos trabao. Riba esaki ta bin 22.101 pensionado cu tambe ta bibando den pobresa. Esnan riba un bijstand, cu ta 4000 famia cu un entrada minimal di Afl.450 te cu maximo di salario minimo Afl. 1948 ta biba continuamente den deficit di entre Afl. 2100 pa Afl. 3000 pa luna. Gabinete Wever Croes ta hincando mas cu mitar di Aruba den un pobresa angustioso y sofocante, esaki cu apoyo di e coalicion minoritario MEP/RAIZ. 

SLA RIBA SLA PA NOS PUEBLO

UNDA 1.5 BIYON A BAI ?

Mr. Mike Eman ta lamenta cu desde cu Gabinete Wever-Croes a sinta pueblo ta haya sla riba sla. Riba tur e medidanan a aumenta prijs di awa y coriente cu 30%; a aumenta schoolgeld barbaramente; a introduci impuesto riba salario ficticio di director/accionista chiquito; a introduci BBO obligatorio pa empresanan cu tin un entrada riba 4200 florin pa luna. Roomtax a subi cu 33%; a kita 40 miyon florin for di fondo di promocion di turismo. A kita descuento riba accijnzen riba gasolin y diesel. Gabinete Wever Croes a fia 900 miyon florin di Hulanda y a cobra e ultimo anjanan 1500 miyon florin extra na medida. Kico pueblo a mira di esaki ? Nada pero nada. Tur rond di Aruba ta constata deterioro di schoolnan, barionan, canchanan deportivo, caretera y edificionan. “Nada di inversion y nada di mantencion. Locual e Presidente di Banco Central e tempo ey a bisa na 2008 di otro Gabinete di MEP cu Aruba ta experienciando un sociale y fysieke verpaupering awe ta bira e realidad doloroso atrobe pa nos pueblo”, e lider di fraccion di AVP, mr. Mike Eman a finalisa enfatisando.