E Politico mas prominente di partido MEP cu a uni su mes cu e partido berde

Diabierna atardi parlamentario y ex-presidente di Parlamento di fraccion di MEP, a anuncia su union cu e partido berde. For di basta tempo caba tabata tin hopi insinuacion den e direccion aki, pero finalmente diabierna esaki a bira oficial.

For di den veranda di cas di su mayornan, unda e la crece, e la haci e anuncio aki den presencia di su famia y un cantidad grandi sostenedornan. Un anuncio cu e la splica cu e la haci despues di consulta extenso cu su famia, amigo y sostenedornan.

El a duna un splicacion amplio di tur e desaroyonan negativo cu tabata tin den partido MEP cu a conduci na su distanciamento di e partido. Tur esaki, segun el a splica, tabata debi cu e la vota pro pueblo di Aruba. Ora cu e la vota, hunto cu colega parlamentario Marisol Lopez-Tromp, pa subi edad di pension di politiconan y baha nan beneficionan, esaki a cay den hopi mal tera den partido MEP.

E ideal di Sra. Wyatt-Ras no tabata wordo sirbi mas den e partido geel. El a splica tambe cu di partido AVP, te hasta den temponan dificil, e por a dialoga cu nan. Tempo cu e la tuma desicionnan cu tabata dificil, asina mes lider di partido AVP nunca a falte respet y semper tabata habri pa dialogo. Algo cu semper e la respeta.