Na Savaneta partido AVP a inaugura un Cas di Partido den bario di Savaneta. Despues di anuncio di Sra. Wyatt-Ras na cas di su mayornan, caminda cu e la anuncia su union cu partido AVP, un masa grandi di sostenedornan a aglomera na e centro politico. Introduci pa Prome Minister di Aruba y alabes lider di AVP, Mike Eman, Sra. Wyatt-Ras a wordo ricibi cu mannan habri y cu un hopi positivismo. Gradiciendo su sostenedornan, esnan cu a introducie na partido AVP, su ruman y primonan, Sra. Wyatt-Ras a bira hopi emocionante y a bisa hopi cla cu e ta hopi satisfecho di por a uni su mes na AVP.

Mike Eman a pidi e publico presente un Bon Bini pa Sra. Wyatt-Ras y inmediatamente a cuminsa un applauso combina cu gritonan di Bon Bini. Un sentimento expresa despues pa Mike de Meza, Benny Sevinger, Otmar Oduber, Michelle Hooijboer-Winklaar, Paul Croes, Baba Herde, Clarisca Velasquez, Melvin Tromp, Juan David Yrausquin, Donny Rasmijn, Alex Schwengle y Desiree Croes.

“Politica na Aruba ta wordo reenforsa,” segun Paul Croes, referiendo na e hecho cu a cambia negativismo pa positivismo ta refleha tambe den politica henter na Aruba.