Tanto e comunidad Latino como e colonianan di tur otro nacionalidad estableci na Aruba ta contento cu e maneho di integracion cu AVP a introduci den Gobierno. E filosofia ta uno cu ta mas humano, cumpliendo cu tur ley di Aruba. Den termino di cuater aña a elimina hopi di e inhusticianan cu tabata tuma luga, e caba cu e buracracia y optimalisa e sistema na fabor di tur partido y ta trata hende manera hende, sin discriminacion. E maneho acutal no ta trata mas di admision, pero di integracion paso nos tur ta ruman, miembro di e mesun comunidad.

E puntonan aki a keda confirma pa loke ta trata e plan di gobernacion di AVP pa e proximo cuater añanan y a keda bon ricibi y acepta diasabra anochi durante e encuentro “Exito de la Integracion.” E actividad a reuni e diferente colonia Latino na Rancho Floralina. Lider di Partido di Pueblo Arubano, Mike Eman a hiba palabra indicando cu ta facil pa mira cu actualmente no ta existi na Aruba otro opcion cu ta carga e filosofia di integracion, manera cu e partido berde a introduci.

“Hamas nos por acepta cu na Aruba tin un partido of un gobernante cu ta bisa ciudadano, yiu, anciano cu su paspoort no ta di aki of cu cedula ta bisa cu no ta naci na Aruba, pa nan bay nan pais. Nunca mas no por ripiti esey na nos pais,” Mike Eman a bisa. Esey, segun e politico no tin di haci hustamente cu politico, pero cu religion Cristian cu ta bisa nos cu “si nos tin cuminda, nos tin cu comparti; si nos tin paña, nos tin cu comparti.”

E candidato number 1 riba e lista berde a señala cu hopi conviccion na su audiencia cu “Si nos tin un scol y nos tin un hospital, nos ta comparti’e cu nos prohimo.” E mandato no ta pa reeligi partido AVP, no ta pa vota pa un candidato di AVP; e reto ta pa garantisa cu e maneho humano cu a introduci ta bay continua. “Si den futuro tin otro partido pa carga e filosofia di integracion, anto tin opcion. Pero aworaki no tin otro partido pa haci esey,” Eman a bisa.

Prome cu el a cera su discurso, el a gradici tur presente pa e calor, amor y stimacion cu nan a brinda semper y en special riba e anochi di diasabra ultimo caminda, segun Eman “nos ta aki hunto, pa garantisa cu dia 27 di september nos por celebra un gran victoria di humanidad. E compromiso ta cu nos ta bay traha ainda mas duro pa tur loke falta.”