Diabierna ultimo candidato number 8 riba lista di partidi AVP, Minister di Economia, Asuntonan Social y Cultura Michelle Hooyboer-Winklaar a comenta riba su experencia como minister y su reponsabilidad como gobernante.

Minister Hooyboer-Winklaar ta bisa cu e experiencia mas bunita cu el a haya ta di mira cuanto hende, cu hopi biaha apesar di nan propio dificultadnan y surpasando esakinan, ta cla pa yuda. Esaki ta un inspiracion grandi p’e. Hendenan cu no ta busca solamente pa haya pero ta cla pa duna; cu ta puntra con nan por yuda nos pais Aruba bay dilanti.

Esaki ta netamente loke partido AVP ta boga pe, esta un comunidad caminda e pueblo ta bin prome, caminda cuidadanonan ta yuda otro pa hunto yuda nos pais progresa.

Loke a resalta durante ultimo añanan ta cu Aruba a bira un comunidad caminda boluntarionan ta traha incansabel den fundacionan sin pensa riba nan mes pero si riba esnan cu ta den necesidad. E sentido di compacion pa otro, di coopera,  ta e forsa cu a pone Aruba bira grandi y ta e caminda di futuro.

Den un comunidad asina no tin lugar pa un grupito cu ta pensa solamente riba su  mes, beneficiando su mes a costo di otronan cu contractnan miyonario.

Minister Hooyboer-Winklaar a bisa cu e ta contento di por a topa y traha cu boluntario den fundacionnan, hendenan cu ta duna di nan tempo liber sin pensa dos bes, pa logra metanan importante. Den deporte, den cultura, den hopi otro cos unda masha hopi hende muhe ta envolvi, cu ta e forsa tras di varios di e fundacionnan.

Minister Hooyboer- Winklaar a toca e tema di participacion di hende muher den gobernacion tambe. Na su opinion, como ser femenino den e gabinete actual, e ta haya ta importante pero tambe logico, cu mas hende muhe mester participa den gobernacion principalmente ora cu mas di 50% di e poblacion ta consisti di hende muhe.