Un gobierno cu no sa con pa goberna y no sa kico pa haci, ta pone cara di e pais na berguensa, y esaki ta loke miembro di fraccion di AVP, sr Arthur Dowers a declara durante conferencia di prensa, cuestionando con Prome Minister di Aruba, Evelyne Wever Croes ta duna declaracion na medionan di comunicacion local y internacional.
“Nos tin un gobierno cu dia pa dia ta pone nos cara na berguensa sigur ora cu Prome Minister bay duna un declaracion na prensa Hulandes cu kisas e mes a manda yama, sali bay gaña pueblo cu bo no tin informacion of no ta compronde kico e ta haciendo, esey por ta pa consumo local y e daña cu Evelyne ta haci, ta daño cu e ta haci ta na su mes.
Sinembargo na momento cu un Minister Presidente di un pais, bay pafo y duna declaracion na prensa Hulandes, informacion cu absolutamente no ta cuadra y pone henter nos pais su cara na berguensa, ta momento cu nos mester coregi esaki.
Nos tin un señora Minister Presidente cu tabatin e curashi di bay den prensa Hulandes y bisa nan cu tin 12 mil Venezolano ilegal riba nos isla y cu awor e lo kier trece mas ya cu e ta sinti cu nan ta den un situacion inhumano den nan pais, trece nan Aruba, registra nan tur, yuda nan, duna awa y cuminda pa despues manda nan pa Bonaire.
Ta un di e cosnan mas bergonsoso cu mi a yega di scucha den Reino Hulandes caminda un pais cu ta un parti autonomo di reino, ta dicidi cu e ta trece Venezolano pais Aruba y manda nan dor pa Bonaire, dunando e impresion cu e ta manda na Bonaire.
Mi ta kere cu ni den tempo neo colonial nos a conoce un situacion cu esaki ta posibel y hustamente nos pais cu semper a bringa duro pa respeta autonomia, y respeta derecho di cada pais, ta nos pais ta bisa awe cu ta bay trece Venezolano aki y despues manda nan Bonaire.
Loke ta hopi doloroso den e caso aki ta e hecho cu pa ocho aña largo cu AVP tabata den gobierno, e asunto di Venezolano semper tabata riba agenda, no solamente na pais Aruba, pero tambe den Reino, pero tambe cu otro paisnan manera Colombia, Merca y Venezuela, un topico di discusion regularmente.
Un tema cu a wordo discuti den Justitieeloverleg, den comision cu a wordo lanta na 2015 cu ta un comision cu tur e top funcionario di departamentonan di Aruba a participa, tin diferente grupo di trabou cu a wordo forma pa esaki, diferente draaiboeken a wordo traha, personanan cu a bay Hulanda pa hiba diferente dialogo, personal di Binnenlandese- y Buitenlandsezaken cu regularmente tabata hiba deliberacion cu nos Gobierno y kendenan a bishita Aruba tambe, pa nos atende cu e asunto di Venezuela.
Pesey no por compronde con nos a bin ta hibando discusion riba e asunto aki pa luna y añanan largo y bo ta bin den gobierno, un di e temanan mas actual, tema mas risico grandi pa nos pais, bo ta sinta papia cu asociacionnan pero bo no a papia cu e top ambtenaarnan kendenan ta esunnan cu ta bay over di siguridad y e risiconan cu nos ta core cu e situacion cu tin na nos pais bisiña.
Esey ta un berguensa nacional pa nos y e ta bira mas ainda un berguensa internacional ora cu bo bay den prensa Hulandes cu ta pone cu e declaracion aki por bay rond mundo y e ora tur hende por mira ta ki clase di Minister Presidente nos tin.
Un Minister Presidente kende ta gusta gaña, el a gaña cu e ta bin cu 7 Minister, el a gaña cu e ta bay baha gasto di gobierno, el a gaña cu e hende ta bira central y nos por a mira cu nan no tin ningun hende central ora cu nan ta kitando hende for di trabou tur dia.
E parti ainda mas tristo ta e hecho cu Premier Wever Croes a papia di un total di 12 mil legal cu lo ta na Aruba, sin cu el a busca informacion adecuado y corecto riba esaki, cual ta algo simplemente imposibel.
Parlamentario Arthur Dowers a mustra cu simplemente Prome Minister Wever Croes a mal informa prensa local y internacional riba henter e asunto aki.