Ta hopi importante na apertura di un aña parlamentario nobo, nos para keto un rato segun miembro di fraccion di AVP, sr Robert Candelaria y refleha bek riba e aña cu a caba di pasa.

“Dialuna nos a cera e aña parlamentario 2017-2018 y nos por a mira diferente  datos y cifranan cu ta mustra cu hopi pregunta a wordo haci y nos ta lamenta cu hopi di nan no a wordo contesta.

Nos lo keda critico y pueblo di Aruba por ta sigura cu despues di un aña di oposicion cu fraccion di AVP a hiba, mirando con gobiero ta funciona, dunando nan espacio pa haci nan trabou, nos a yega na e punto aworaki cu ta basta!

Nos a yega na un punto caminda cu mester bin cambionan, nos ta dilanti di un aña hopi dificil financiero pa pais Aruba,  y den e discurso cu gobierno a prepara pa su Excelencia Gobernador, cu nos ta mira cu diferente proyecto cu gobierno di AVP a laga atras, specificamente den e area cu mi ta focus hopi ariba cu ta di husticia, lo wordo continua  y esaki mi ta kere ta algo bon.

Nos no  scucha di hopi plan nobo di gobierno pa e aña venidero pero mi ta kere cu e retonan grandi financiero cu gobierno tin, vooral poniendo esaki den e balansa y contexto di nombracionnan politico cu a sigui acumula mas y mas, persecucionnan politico cu nos ta keda mira, cu ta sigui cada dia, pero tambe cu retonan financiero poni pa CFT.

Mi ta kere cu e aña aki lo ta un aña cu ta bay bira sumamente importante y pueblo por conta cu fraccion di AVP, cu ta bay hiba un oposion mas y mas critico,  mirando cu pa casi un aña caba nos no ta mirando mehoracion, nos no ta mirando e visionnan cla di gobierno, mi ta kere cu awor ta e momento cu cambionan mester bin y cosnan tin cu cuminsa bolter.

Nos ta mira padilanti pa un aña cu  hopi, cu hopi reto pero sigur un aña cu nos ta bay cuminsa mira cu cosnan cu no ta canando bon lo yega na nan final y cu pueblo por tin un speransa cu pronto lo tin un cambio,”  Robert Candelaria di fraccion di AVP a declara.