Na ocasion di celebracion di apertura di parlamentario nobo, miembro di fraccion di AVP, sr Arthur Dowers a mustra di ta bon pa para keto un rato y analisa e desaroyonan cu tin den ultimo lunanan.

“Ta na su lugar pa na e ocasion aki, nos dedica un tiki atencion na e proceso den parlamento caminda nos a conoce un aña den parlamento caminda cu a keda confirma cu Aruba tin un stempelparliament, esey ta un cos  cu den pasado nos no a mira esaki nunca asina grave compara cu awor.

Aworaki nos por mira no solamente e mesun cosnan tradicional caminda por ehempel ta gobierno ta nombra presidente y vice presidente di parlamento, bo ta haya  cu awor ta gobierno ta dicidi ki momento ta tene reunion den parlamento, gobierno ta dicidi ki ora ta cancela un reunion di parlamento y gobierno ta yama reunion den parlamento ora cu gobierno ta haya ta bon.

Ta un cos cu nunca nos a mira antes tuma luga, caminda nos por a mira den e caso di Serlimar con un situacion sumamente bergonsoso a tuma luga, caminda ultimo momento gobierno ta para e reunion y despues gobierno ta nombre.

Gobierno ta haci tur loke nan ta kere ta bon den  sala aki, y mi ta spera cu e aña aki, e parlamentarionan cu ta considera nan mes profesional cu nan wowo lo habri y nan realisa cu loke nan ta haciendo no ta profesional.

Banda di esey nos  a mira diferente palabra di gobierno  riba plannan pa gobernacion y aki mi tin cu bisa cu masha poco hende ta kere den e gobierno aki comokiera cu esaki ta un gobierno cu pa prome biaha den historia di e pais aki, cu a bay un campaña cu hopi promesa na pueblo pero te na e momentonan aki nan a haci exactamente lo contrario na loke nan a priminti.

Mi ta kere cu lo ta bon pa recorda pueblo cu esaki ta un coalicion cu eigenlijk pueblo no a desea, mirando cu pueblo ta teniendo cuenta cu lo no bini un cooperacion entre un grupo di hende cu a yama otro pa bandido, yama otro pa criminal y ladron pero hustamente nan a cera cabes hunto pa nan ta den poder.

Den poder na e momentonan aki nan no ta haciendo nada cu ta contribuyendo na beneficio directo di pueblo, sino saca e placa directo for di saco di pueblo y mi ta kere cu esey ta e forma mas facil di gobernacion.

Nos a traha hopi duro e tempo aya, lucha hopi duro, kibra hopi cabes pa nos por a yega na solucionnan cu nos no ta mishi cu pueblo directamente, por a mira cu durante di nos gobernacion inflacion a baha drasticamente, caminda tur hende a haya un rosea bek despues di ocho aña di tirania di gobierno di MEP.

Por a mira tambe cu e gobierno aki di MEP cu atrobe ta den gobierno, a pasa un BBO contra pueblo despues di no haci nada den ocho aña, awor tur pa tur hende ta hopi visibel tur loke nos gobierno a laga atras, y mi ta sigur cu hopi hende aworaki ta lamenta cu nan a scoge pa un grupo di hende cu ta pensa riba nan mes, riba nan saco y riba nan famia y amigonan,” Parlamentario Arthur Dowers a declara.