Ayera den reunion publico di Parlamento a trata e peticion di colega Mike de Meza, Dowers y Wyatt-Ras hunto cu otro coleganan di fraccion di AVP encuanto e situacion alarmante di criminalidad y e situacion social deplorabel bou di hobennan. E reunion a ser pidi for di november 2021 y a manda 2 carta di rappel na februari y maart, prome cu a yama e reunion.
Por bisa cu e situacion di criminalidad bou hobennan ta preocupante, pa motibo cu tin un cantidad di hobennan cu ta wordo haya cu arma y tin diferente asesinatonan cu a tuma lugar den curso di ultimo anjanan. A bira casi “normal” cu hobennan ta mata otro of mata otro hende. Wyatt-Ras a menciona e declaracion na juli 2021 di vocero di cuerpo policial, sr. Lito Lacle, den caul e ta trece padilanti cu tin un cantidad preocupante di 6 caso di asesinato cu tiroteo. Un di nan ta na American Bar y di e chauffeur cu a ser alacansa pa dos tiro den area di Tanki Leendert. El a trece padilanti cu na 2020 tabatin confisca un cantidad di 32 arma y pa anja 2021 te cu juli tabatin 10 arma di candela confisca. Sinembargo e minister encarga cu Justicia y Asuntonan Social den su contestanan durante reunion a bisa cu e situacion ta stabil. E no ta mira cu tin mucho cambio den e ultimo anjanan. E ta bisa mas bien cu e cantidad di armanan of asesinatonan a baha. Segun Wyatt-Ras esey no ta cuadra cu locual nos a tuma nota di dje den prensa. Wyatt-Ras a ilustra cu diferente caso cu a sali publica:
Dos acusadonan Zuriel Amiel Celaire y Izak Principaal a ser acusa di homicidio riba Sayuri Petronia cu a shock comunidad. Dia 4 di juni 2021 a los tiro cu arma di candela riba Sayuri cu consecuencia cu victima a fayece. Dia 11 februari 2021 den Corte a declara Dylan Delaney culpable di asesinato di Marc Mejia den American Bar. El a haya 12 anja di prison. Dia 26 di november 2021 rumannan Wouters a ser condena na 18 anja pa mata Sammy Ignacio. Dia 12 di april 2021 Pascal Brown a yega na cas di Richi Genau na Brazil, a hay’e sinta den su veranda y a tir’e den cabes. Dia 20 di juli 2021 e hoben L.N. di 16 anja a ser acusa di asesinato di su welo y hues a dune 36 luna di detention hubenil di cual 18 luna a condicional cu 2 anja di prueba. Dia 25 di juni 2021, Corte a trata e caso di e mucha di 16 anja cu a ser acusa di hinca Rudolf Ras y asesin’e. A conden’e na 12 luna di prison, di cual 4 luna ta condicional, cu 2 anja di prueba y bou guia di Reclassering.
Pa loke ta trata abuso sexual di menor Wyatt-Ras a menciona: caso di dia 28 di januari 2022 di e conocido locutor Elvis Weert cu acusacion di rape di mucha muhe yiu di su pareha. El a obliga e mucha muher di comete abortus 2 biaha. Tambe dia 6 di oktober 2021 e caso di abuso sexual di Apostel cu’n menor den periodo di 13 di maart 2018 te prome di november 2018. Dia 16 di juli 2021 tabatin detencion di Franklin Priest di 36 anja, empleado publico, trahando na buro Leerplicht, entrenado di varios equipo di voetbal, pa abuso sexual di dos mucha muhe menor di edad. Na februari 2020 tin alabes e caso di e chauffeur di autobus cu a abusa di yiu di colega y e colega aki a comete suicidio despues cu e no a haya oido niun caminda.
Por constata cu prensa a bira hopi agresivo pa pone e diferente casonan aki na conocimento di pueblo. Esaki ta positivo. Wyatt-Ras ta trece dilanti cu tin un correlation entre criminalidad y situacion social.
Segun jaarverslag di Stichting Reclassering en Kinderbescherming 80% di hobennan cu ta cai bou nan guia tin limitacion mental leve. Di e hobennan cu ta haya nan mes confronta cu justicia y cu ta ser deteni 65% ta procedente di famia di un solo mayor. Di e hobennan aki 50% ta dropouts. Pues ta necesario pa empodera mayornan soltero(a) cu ta na cabes di nan famia y tambe preveni cu hobennan cu ta cai for di e trajecto escolar (dropout). Esaki AVP a haci na 2011 cu ley di Leerplicht y trajecto di formacion social.
Gobierno di Evelyn Wever-Croes cu a sinta na anja 2017 a crea un crisis social y a bisa cu nada no a wordo haci anterior pa sector social y a bin cu un crisisplan pa baha wachtlijsten den sector social y drecha e.o. registracion, cooperacion, referencia di casonan y leynan. Nada di esakinan no a logra. E hecho cu a traha anteriormente ta sali na cla for di trabou di mesun UNICEF cu ta sostene e gobierno aki tambe.
Mike Eman su Gabinete tambe a traha cu UNICEF pa empodera nos hubentud y a inverti den prevencion. Awor den e crisisplan aki e gobierno aki a traha cu mesun UNICEF. UNICEF a fiha atrobe diferente criteria y metanan pa logra den e temporada cu nan ta traha. Mester tin bon registracion pa sa cuanto caso tin, ki ta e problema y na cua instancia e cliente ta. Esaki no a ser logra dor di e gobierno aki cu un crisisplan di 36 miyon florin.
Un otro criteria ta cu lo mester tin bon cooperacion entre diferente instancianan y ora un mayor yega na un instancia pa busca yudansa pa su yiu e mester ser ser atendi of referi na un otro instancia cu tratamento di inmediato of a corto plaso. Esaki ainda no ta bon regla. E valor di buro SOSTENEMI cu e mester ta un meldpunt pa acudi ora tin abuso apesar di ta ancra desde 2016 den Codigo Civil tampoco no a functiona manera debe ser. Esaki por saca for di mesun rapport di SOSTENEMI den cual ta menciona cu mester tabatin mas PR pa clientenan por sa unda pa acudi.
Ademas crisisplan no a logra baha e wachtlijsten aunke cu e minister ta haci comosifuera no tin wachtlijst mas. Tampoco no a logra e meta di prevencion cu ta atende cu bullying y cu postitive reinforcement.
Mientrastanto bo por bisa cu 36 miyon florin a ser inverti den un crisis social crea cu no ta mira su efectonan manera cu mester ta. Diferente instancia ta keda sin haya sosten pa executa e proyectonan cu nan tabatin planea. Ta importante cu na momento cu pone placa disponibel e instancianan mester por ricibi locual cu nan a pidi p’e.
Aki nos a cuestiona gobierno den esaki. Tambe gobierno tin pensa di bin cu un Family Justice Center pa fortifica cooperacion. Segun Wyatt-Ras ni un edificio, ni mas trahado no por garantisa cooperacion. Boluntad, conocemento di mandato y rollen di cada instancia y un bon coordinacion por garantisa cooperacion. En bista cu cantidad di casonan di criminalidad ta sigui subi ta mustra cu e crisisplan no a logra su meta.
Durante ultimo lunanan mayornan tin’e mas dificil, no por pone pan ariba mesa di nan famia, tambe tin diferente problemanan social cu a bira mas bisto y mas urgente y tin cantidad di casonan di depresion y e instancianan cu mester duna e ayudo apesar di e suma inverti, no a logra baha e wachtlijst pa haya yudansa. Paso aunke minister ta indica cu e wachtlijst a wordo elimina, esey no ta e realidad. Pa un mucha chikito por wak un psycholoog of psychiatra di mucha ta dura un anja. Kiermeen esaki no ta wega.
Wyatt-Ras ta lamenta cu diferente mocionnan cu a ser presenta pa duna sosten social na nos pueblo ningun no a ser sosteni dor di esnan cu ta sostene gobierno. Un di nan ta pa elimina tur medida cu ta afecta nos famianan y mayornan. Un otro mocion ta pa nos proteha nos muchanan pa medio di e diferente facilidadnan cu ta duna acohida tempran na nos muchanan, manera crechenan y tambe Trai Merdianan caminda nada no mag wordo kita for di nan. Na e momentonan aki na Trai Merdianan no ta wordo duna huiswerkbegeleiding y netamente mayornan cu no tin e capacidad pa yuda nan yiunan y esunnan cu ta traha oranan largo tabata depende di e yudansa cu huiswerk di nan yiunan. Tambe e mocion cu no a ser aproba ta pa bin cu cursonan y programanan pa hobennan cu ta den KIA pa fortifica nan y pa na momento nan sali nan por reintegra den nos comunidad. Un otro mocion cu no a ser sosteni ta pa esnan cu tin arma pa por entrega esakinan sin consecuencia pa por baha e cantidad di arma riba caya. Por a nota un postura arrogante di oposicion cu yen di gritadera pa purba silencia fraccion di AVP y oposicion. Segun Wyatt-Ras nos hubentud mester ta prioridad di nos pais, nos famianan vulnerable ta di importancia pa ser empodera pa preveni criminalidad den comunidad. E suma di 36 miyon no tabatin e efecto indica sino awe no tin asina tanto caso di criminalidad y di asesinato dor di hobennan. Ora trata presupuesto lo sigui cuestiona esaki mas aleu.
