Dialuna henter día Parlamento di Aruba a reuni tratando e preocupación grandi cu tin den comunidad cu aumento espantoso di criminalidad bao hobenan y hopi vez cu armanan di candela. Durante e reunión di Parlamento e Líder di Fraccion di AVP, mr. Mike Eman, a presenta den nomber di fraccion di AVP, un moción pa Gabinete Wever-Croes para tur medida cu ta afecta famianan di menos recurso. 

E moción aki a bin a raíz di un discurso di líder di fraccion di AVP, mr. Mike Eman substancia cu estudionan científico. Eman cu e estudionan aki den man a mustra riba e corelacion entre e medidanan di Gabinete Wever Croes y situación social económico pésimo den nos hogarnan y nan efecto riba fracturación di famia. E a mustra cu e medidanan di Wever-Croes ta causa pobreza y cu estuidionan ta mustra cu pobreza ta fractura famianan y den e ambiente difícil, doloroso y penoso aki hopi vez hobenan ta desvía. Esaki ta locual tin a raíz di criminalidad bao hobenan.

Eman a cita un rapport cu ta bisa: “Niet alleen is de wooncontext duidelijk direct van invloed op jeugdcriminaliteit, ook werkt het door via de duurzaamheid van contacten, de culturele participatie en het gebruik van alcohol en drugs, niet geheel toevallig precies de variabelen die significant scoorden op jeugdcriminaliteit”.   

Pa e motibo aki e lider di fraccion di AVP, mr. Mike Eman a presenta den nomber di su fraccion un moción pa para e medidanan cu ta crea pobreza y ta crea hopi stress, incertidumbre y desesperación den famianan na Aruba. E moción ta urgi pa Gabinete Wever Croes elimina medidanan cu ta afectando esnan di menos recurso. Tambe e moción ta urgi Gabinete Wever-Croes pa no bin cu mas medida cu ta bai afecta esnan di menos recurso.

E moción di fraccion di AVP a worde sosteni dor di fraccion di MAS y ACCION 21. Cu fraccion di MEP lo a vota contra tabata di spera. E tabata poco sorprendente cu un fraccion manera di RAIZ tambe a bira parti di e maneho aki di Gabinete Wever Croes cu ta creando un pobreza penoso den nos comunidad. Hunto MEP y RAIZ a blokea e moción di AVP. 

Mr. Mike Eman na final di e reunión largo aki, cu fraccion di AVP a solicita pa trata e tema di criminalidad bao di hobenan, a bisa cu fraccion di AVP lo sigui lucha contra di e medidanan cu Gabinete Wever Croes ta implementando cu ta bai na empeora e situación di pobreza den nos comunidad. Den tempo di AVP hustamente tabata bin cu decisionan pa juda esnan di menos recurso, mr. Mike Eman a infatisa.