San Nicolas ta bay bira e segundo industria turistico di Aruba pasobra eynan tin cultura, historia y herencia di Pais Aruba
Diabierna anochi Team Otmar a organiza un Happy Hour na Centro di Apoyo na San Nicolas, hunto cu varios di e candidatonan di Pariba di Brug di partido AVP, un happy hour cu a bira uno hopi grandi cu cientos di persona presente. Pa pone ambiente a busca banda y DJ di San Nicolas y mester bisa cu nan a haci un hopi bon trabou, tur hende presente a disfruta di e bon musica di 2Sweet, Socatrain, Smash y Failures.
Candidatonan di AVP presente e dia ey tabata Otmar Oduber, Mike de Meza, Clarisca Velasquez, LornaVarlack y Chris Dammers. E atardi y anochi a transcuri na un forma hopi ameno caminda e candidatonan a comparti cu tur esnan presente y a dirigi nan mes na e publico.
Mike de Meza y a bisa: “This is one party that works together as a team, all the colleagues are a big family and we move all over Aruba and we are working for the whole Aruba…My colleague has done a fantastic job and I tell everybody he’s my best friend because as the minister of Finance he’s the one who brings the money in. As you know tourism is very important for the island and from tourism is where we get the majority of the income and with minister Oduber we can be sure that only good things will happen to Aruba, and also San Nicolas. Otmar tur dia abo ta welcome na San Nicolas, bo suegro a lanta akinan mes y Otmar a wordo fura tambe na San Nicolas”.
Mike de Meza a sigui bisa cu nan tin un partido, un partido cu a haya un mandatato na aña 2009 pa bay goberna e pais aki cu 12 asiento. Nan tabatin hopi reto nan dilanti y nan no a ria, Promer Minister Mike Eman, un visionario, un persona dedica na lo cual ta bon pa e isla akinan a sa di pone un team hunto di ministernan cu tin dedidacion pa full Aruba y cada colega ta traha conhuntamente, contrario na antes aki ta papia di un team di rumannan cu ta traha hunto pa drecha Aruba completo.
Continuando el a sigui bisa cu e trabounan di Otmar Oduber no tabata na e parti pabou di brug so, tambe pa pariba di brug y cu e ta sumamente orguyoso di dje “y nos ta haci e trabounan conhuntamente pa Aruba completo, esey ta inclui San Nicolas tambe! Otmar, it’s an honor to work with you, you’re a good man. You’re a good man for the island of Aruba, you’re a good man for San Nicolas too. We’re one big family boy”.
Siguientemente Otmar Oduber a hiba palabra y a cuminsa na pidi un fuerte aplauso pa e yiu di San Nicolas y su bon amigo, Mike de Meza. “Mike ta un persona cu unda cu e para e ta elogia su coleganan, e ta purba mustra como si fuera cu ta nos ta haci mayoria di e trabou y awe nochi mi kier pa e sinti e calor cu San Nicolas tambe ta dune, pasobra e guy aki ta traha 12 pa 14 ora. E no ta importa e luho pa ta pafor ta anuncia un proyecto of ta firma pa un proyecto, pero e ta encarga cu e finanzas publico di e pais aki, un condicion pa nos por haci e proyectonan den su nomber tambe. Un persona sumamente humilde, un persona di un famia sumamente keri aki riba tambe y pesey laga awe nochi ta un ehempel di con uni nos por ta como Aruba, pasobra na final di cuenta nos ta yega di un bario pa otro akinan na Aruba y ta braza otro y ta stima Aruba”.
Otmar a continua bisando cu San Nicolas ta keda den nan curazon y San Nicolas ta bay bira e segundo industria turistico di Aruba pasobra eynan tin cultura, historia y herencia di Pais Aruba. “Mi ta compromete den nomber di Gabinete Mike Eman, mi colega Mike de Meza, nos Promer Minister y tur mi coleganan cu nos ta bay saca San Nicolas mas dilanti ainda y ta bay sigui cu mas proyecto pariba di nos isla”.
