Diadomingo Otmar Oduber hunto cu Team Otmar tabatin un exitoso accion di pega stickers na Centro di Apoyo San Nicolas. For di oranan di mainta tabatin un ambiente hopi ameno caminda un cantidad grandi di hende a yega pa pega nan sticker nobo di Otmar y #4 riba nan windshield, pero tambe nan C-Thru, mustrando di e forma aki nan apoyo y sosten na e candidato # 4 riba lista di AVP cu a demostra cu e ta traha y ta cumpli na bienestar di nos hendenan.
Durante e dia aki Otmar Oduber, kende ta nos Minister di Turismo, Transporte y Labor a bin dilanti y mustra cu su compromiso cu San Nicolas ta sigui.

Ya caba a presenta un cantidad di proyecto realiza no solamente na San Nicolas, pero tambe Pariba di Brug en general, demostrando asina cu e tin su curazon na San Nicolas tambe. Entre e proyectonan ya caba ehecuta por meniona Carubbian Festival, renovacion y ampliacion di pier na Cura Cabay/Zeewijk, Oficina di Informacion di Turismo, Sucursalnan di DAO y DPL den centro di San Nicolas, mescos Community Museum. Tambe tin un cantidad grandi di proyecto cu ta den realizacion of ta bay cuminsa dentro di poco y cu lo duna un realce grandi na e parti pariba di nos isla.

Vision di Otmar Oduber ta pa haci di San Nicolas e di dos capital turistico di Aruba. E promer capital turistico ta Palm Beach cu tur su aspectonan moderno y di ciudad grandi. San Nicolas di otro banda mester bira e lugar caminda por haya cultura, historia, herencia, lo cual ta loke e turistanan awendia ta buscando. “Ora un turista bay cu vakantie, nan kier haya sa mas di e cultura, historia y herencia di e pais cu nan ta bishita y e lugar caminda cu nos por haya tur e ingredientenan aki ta na San Nicolas, pesey mi compromiso pa haci di San Nicolas e di dos Capital Turistico di Aruba ta sigui y esaki lo mester wordo logra den e proximo 4 añanan”.