fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

DSC_0117Den un ambiente di kita sombre y un aire cu ta respira positivismo el a lanta tur hende di nan stul

E sala tabata yen cu hendenan entusiasma, e ambiente tabata di kita sombre, e  aire tabata respira positivismo na momento cu lider di partido AVP a subi stage pa dirigi palabra na e multitud cu tabata grita den un solo bos pa minutnan largo ‘Mike ta di nos’. E lugar a tembla. Ta den e esfera di alegria aki cu  Mike Eman y su partido ta bay eleccion aki seis siman.

“Awenochi mi curazon ta yena di emocion”, asina Mike Eman a cuminsa su discurso. “Nos tabatin y tin ainda retonan grandi nos dilanti. Nos kier habri portanan cu ta cera, kita obstaculonan cu ta den caminda pa asina nos comunidad por crece y saca un man pa esnan den mas necesidad den nos comunidad”. Eman a subraya cu e trabou pa comunidad y pa futuro generacionnan no tabata posibel si nos Creador no a inculca den e politico y den esnan cu ta compañe den e reto aki, un sentimento special pa comunidad y e pais cu e mester sirbi. Bayendo bek den historia Eman a bisa cu dia 7 di augustus 1887 su welo a nace na Aruba, un pais cu apenas un par di mil hende. Dia 17 di mei 1916 su tata Shon A Eman a nace riba e isla Aruba cu un par di mil hende mas. “Ora mi a sali di mi cas awe biniendo p’aki mi ta mira na mi man robez e busto di mi tata Shon A Eman y na mi man drechi mi ta bira wak e estatua di mi abuelo Henny Eman. Di e reconocimento y estatua aki mi no ta sinti ningun derecho special como yiu of nieto. Mi ta sinti un compromiso. Un compromiso pa sirbi e pais aki manera cu nan a haci’e. Un compromiso pa sacrifica manera nan a sacrifica. Un tarea pa cana, marcha y lucha cu e pueblo aki manera nan a cana, marcha y lucha cu e pueblo”. Un awacero di aplauso y gritonan di apoyo a sigui. “

Mike Eman a sigui bisa cu ta e sentimentonan aki e ta trata na transmiti tur dia den curazon di cada un cu por yuda haci un diferencia pa e pais aki. “Mi ta mira den e multitud aki cara di hendenan cu a nifica hopi pa Aruba. Nan a nifica luz ora tabatin scuridad. Nan a para pa principio y fundamentonan importante. Mi ta sinti mi mes sumamente honra cu presencia di sra.Digna Lacle kende a tuma e molester pa ta aki awe hunto cu nos. Esaki ta muestra di e compromiso cu hunto nos tin cu demostra  dia 27 di september. Aruba ta para hunto cu nos”. Mike Eman a papia di union. E comunidad ta uniendo y  division ya no ta exisiti mas. Partido AVP, e partido mas bieu di Aruba ta sigui haya su hendenan bek.

“Mi ta mira con despues di hopi aña y hasta mi por bisa decadanan, un ex lider di partido AVP ta bek den nos seno aki den”. Rudy Frank a haya un aplauso grandi di e publico cu a aprecia su presencia den e sala. Eman a ilustra e amor cu nos tur tin pa e isla aki cu yama Aruba. Su sobrina Anouk kende a conta con p’e Aruba ta asina importante na momento di a gana su medaya di oro y con para banda di su otro sobrino Trevor despues di a logra gana e campeonato nacional di Merca nan a sinti un orguyo grandi pa e isla Aruba. “Mi a yena cu un orguyo grandi cu un hoben di e suelo aki ta sali campeon di Merca. Un nacion asina grandi”. E amor pa Aruba ta grandi. “E pasion pa nos pais Aruba…chikito y simpel e por ta, pero si respeta…manera Padu a pone den nos Himno nacional”. Mike Eman a pidi atencion pa presencia di Padu Lampe kende a milita cu su abuelo, cu su tata y su ruman y kende awe apesar di su edad respeta ta para den su caminsa berde banda di lider di AVP durante e anochi  special aki. “Si Padu, Aruba por ta chikito, pero si respeta. Padu ta un homber grandi. El a inculca den curazon di cada Arubiano e sentimento cu Arubianonan por triumfa. Danki Padu”.  Esaki ta e prome parti di e discurso eclatante di lider di AVP Mike Eman. Un discurso cu a emociona hopi di esnan presente.