Benny Sevinger a tuma oportunidad durante e conferencia di prensa semanal di Partido di Pueblo Arubano (AVP), pa reacciona riba e decision cu ministerio publico a anuncia e siman aki pa cu e sospechoso Hans Geerman den caso Flamingo.
Comparando e manera con a atende cu caso similar anterior, e politico, kende su mes ta considera di ta persigui politicamente, a indica cu no por yega na otro conclusion cu ministerio publico di Aruba ta actua di manera partidista y ta midi cu diferente midi.
E pensamento ta uno cu e politico a bisa di ta biba fuertemente den e comunidad di Aruba tambe. “Si bo ta ciego mes, bo por mira con e ministerio publico ta actua,” el a expresa. A base di loke e mes a biba, con a actua contra dje y con ta maneha cu esunnan yega na partido MEP, e no por saca otro conclusion.
Sevinger a lesa textualmente e comunicado di prensa cu ministerio publico a emiti dialuna ultimo informando cu a cera un acuerdo di transaccion cu Hans Geerman pa e paga bek 120 mil florin di Pais Aruba, mas un boet di 5 mil florin. Geerman ta sospecha di a estafa Pais Aruba y di corupcion activo como un empleado publico ‘spirito’. Ex Minister Otmar Oduber a nombra Geerman como medewerker bedrijfsvoering, pero no a haci ningun trabou.
Sinembargo, Sevinger ta denuncia cu, como cu Geerman ta un persona liga na partido MEP y na Prome Minister Evelyn Wever-Croes, ministerio publico a dicidi pa yega na un acuerdo cu ne argumentando cu esaki no ta afecta e investigacion y no tabatin partido perhudica. Esaki ta hopi diferente na e trato cu ex parlamentario Alan Howell a haya, Sevinger a indica. Ministerio Publico si a condena Howell na 2 aña di prison, mas cu e tin cu paga bek e 100 mil florin cu el a horta como lider di fraccion di POR den Parlamento.
Sevinger: “Hans Geerman cu a horta mas, ta haya un acuerdo pa pag’e bek, no ta persigui penal, ni un dia a drenta su cas, no a bay radio wak ki ta sosode eynan. E ta haya un deal. Puntra bo mes cuanto midi bo tin. Anto bo no kier pa mi pensa cu ministerio publico ta influencia politicamente. Pero bo no ta MEP, nos ta persigui bo y cera bo. Si bo ta MEP, bo por paga bek.”
E parlamentario di AVP ta teme cu lo duna Besaril un acuerdo parecido. A pesar cu a comproba cu e ex Minister Plenipotenciario a perde debidamente su trabou pasobra el a comete actonan coruptivo cu placa di Pais Aruba pa biba na grandi y cumpra cosnan personal, ministerio publico lo yega nan un acuerdo tambe cu ne y opta pa no persigui’e penalmente. “Si esey sosode, mi por bisa cu e pueblo aki no ta bay acepta esey,” Sevinger a indica.
Su persona si ministerio publico tin seis aña ta investiga, aunke Hues a bisa cu den e 24 mil pagina di e investigacion no tin un papel, ni mensahe of tap caminda el a pidi un hende placa of un hende a bis’e cu ta dun’e placa a cambio di algo. Pero pa Benny Sevinger si ministerio publico a pidi 5 aña di prizon y pa keda 10 aña for di politica.
Segun Sevinger, loke Geerman y Besaril a haci no ta diferente di loke Evelyn Wever-Croes ta haci. Ministerio publico mester investiga pakico oficina di abogado ta cobra Pais Aruba miyones sin duna declaracion di kico. Sevinger a bisa di tin e documento cu ta prueba esey y con e bufete ta cobra di forma exagera y sin hustificacion. Di mes manera ministerio publico lo mester investiga placa cu a duna Citgo y caso di Vacuna Gate, djis pa menciona algun. Tur ta caso cu ministerio publico a seponeer pasobra ta yega hopi cerca di Gabinete Wever-Croes, mescos cu esun di Briesen, Romero y helicopter caminda a horta Pais Aruba miyones di florin.
Mas reciente, ministerio publico ta participa den persecucion politico y di prensa ora cu Speed Andrade y Patrick Paskel a keda adverti door di e procurador general, prome cu el a bandona e isla, cu nan lo wordo yama aden y esey a sosode tambe pa duna cuenta di loke ta acusa e gobierno actual di dje.
Pa conclui, Sevinger a bisa enfatisa cu pueblo ta mira y ta ripara loke ta sosodiendo. “Nan (Gabinete Wever-Croes) por drumi awo, nan por hari y gosa di tur loke nan tin como influencia politico den husticia, pero e dia lo yega cu e ontruiming lo tuma luga y berdaderamente persecucion lo tuma luga riba e hendenan aki pa tur e actonan delictivo cu nan a haci.”
Di su parti, e parlamentario a reitera su compromiso di keda informa pueblo, hiba su lucha, hunto cu su famia, sostenedo y partido y cu e ta sigur cu algun dia Dios lo bisa e hendenan aki: ta basta.
