Raad van State, e organo di conseho mas halto den Reino awe a ricibi Líder di fracción di AVP, mr. Mike Eman y consehero di Fracción Wendrick Cicilia den despacho di e Vice-Presidente, Thom de Graaf.

Eman y Cicilia a reuni cu e Vicepresidente, Thom de Graaf y Ron van der Veer, raadsadviseur na Raad van State riba e tema di e nota di fracción di AVP riba e aspectonan social económico cu mester haya mas atención. Den e contexto aki fracción di AVP a cuminsa desaroya ideanan cu por pone e realidad socio económico di Aruba y e pueblo mas central. Pa juda carga un cambio asina fracción di AVP ta propone diferente cambio, entre nan pa introduci banda di Caft tambe un Sociaal Cultureel Planbureau. 

E pensamento aki mr. Mike Eman a splica awe den e reunión cu Raad van State y con esaki lo juda tambe e enfoque riba nececidadnan social económico localmente na Aruba, pero tambe pone e relacionnan den Reino den un contexto mas amplio, caminda e organanonan cu tin influencia riba maneho y decisión lo tin un bista mas cla y profundo di e factornan cu ta afecta calidad di bida di e ciudadania di Aruba.

Na final di e reunion, mr. Mike Eman a expresa di tabata hopi contento pa na e nivel mas halto aki den Reino, pa locual ta trata organonan di conseho por a presenta e nota ‘The Bigger Picture’, een pleidooi voor de institutionalisering van een Sociaal Cultureel Planbureau Aruba. Wendrick Cicilia a mustra cu e busqueda di bon comun di Aruba su pueblo ta un reponsabilidad primariamente di nos mes, pero ta esencial pa incorpora organonan di Reino Hulandes cu y tin influencia riba nos futuro den pensamento riba con mihor nos por sirbi nos comunidadnan.

E lider di fraccion mr. Mike Eman a termina bisando cu Raad van State semper a hunga un rol importante den pone e relacion entre Aruba y Hulanda den contexto di locual a largo plazo ta mihor pa Aruba y tambe pa e relacionan den Reino. E encuentronan aki según mr. Mike Eman ta creando un ‘draagvlak’ importante pa e proposicion di fraccion di AVP.   

i