Gabinete Wever Croes lo bay den historia politico di  pais Aruba, como e gobierno cu mas a keda sin cumpli cu promesanan haci durante di campaña y ta algo cu ainda despues di casi tres aña, ta sigui tuma luga

Parlamentario Robert Candelaria di fraccion di AVP a mustra c’un otro punto remarcabel ta cu gobierno awor lo presenta un ley pa aumenta castigo maximo di casonan di abuso contra mucha. Abuso contra menor ta algo cu pa hopi tempo caba ta un fuente di dolor y rabia den nos comunidad. 

“Loke ta di lamenta si ta cu Prome Minister actual y Minister di Husticia a priminti na pueblo cu nan  lo bin cu castigo minimo. Kico ta e diferencia entre castigo minimo y castigo maximo? 

Castigo maximo ta maximo cantidad di aña cu Corte por sentencia un persona pero ta un hecho cu castigo maximo ta existi caba pero logicamente por subi esaki semper cu mas aña.

Aki e Hues ta liber pa sentencia e culpabel na cuanto aña cu e ta haña necesario, basta e no pasa e cantidad maximo di aña. 

E diferecia cu castigo maximo ta cu castigo minimo ta un cantidad di aña minimo c’un Hues mester duna un hende cu e ta haña culpabel. Aki e Hues no ta liber pa duna menos cu e castigo minimo cu ley lo stipula pa e duna. 

Por aumenta castigo te e maximo di bida largo pero esaki no ta un garantia cu e castigonan lo subi, pasobra e Hues ta liber pa sentencia cuanto aña e ta haña nesesario pa e castigo di e delito. Castigo minimo si lo mara  man di Hues cu e no por baha bou un cierto cantidad di aña cu ley ta stipula. 

Pa splica pueblo bon cla, esunnan cu awor ta den gobierno, a priminti cu nan lo introduci un castigo minimo pero awor gobierno ta presenta un ley cu no ta loke nan a priminti, pasobra awor kier bin un biaha mas cu aumento di ley maximo y no introduccion di castigo minimo.

E discusion tecnico di introduccion di castigo minimo cu a wordo hiba den e parlamento anterior ta lo siguiente. Castigo minimo ta incera c’un Hues ta haña su mes den un situacion na unda e por haña c’un persona ta culpabel na un hecho castigabel pero ora e tene cuenta cu si e sentencia e persona como culpabel e ta obliga pa duna e persona un castigo minimo, e por opta pa no sentencia e persona pasobra cu den su opinion e castigo minimo den e caso specifico por ta mucho pisa. Esaki naturalmente no ta e solucion tampoco. 

Minister di husticia tabatin 8 aña den Parlamento y awor e tin 3 aña como Minister y na luga di a traha riba esaki pa cumpli cu su promesa y di su coleganan cu a priminti mes cos, awor e ta bin cu algo cu no a wordo priminti.

Un Minister cu personalmente a dicidi pa laga algun pedofiel den libertad prome cu nan tempo, no por permiti su mes pa sigui culpa e gobernacion anterior mas na luga di garantisa cu su legacy lo ta cu e ta laga husticia miho atras cu loke el a haña. 

Na aña 2015 Parlamento a aumenta diferente castigo maximo pa casonan di abuso di mucha. Mi ta kere cu nos tur kier pa un hende cu abusa di mucha haña un castigo severo, pasobra ta un ser indefenso a wordo abusa. Loke nos ta keda bisa si cu nos codigo penal so no ta e solucion. Mester trata e persona cu hasi su mes culpabel pa esaki, pasobra mester evita ripiticion. Mester di un maneho integral cu ta inclui castigo di e culpabel, ayudo y guia pa e victima, guia pa e culpabel y rehabilitacion. Loke mester di dje ta prevencion pa abuso tuma luga of pa e ripiti. 

Loke tambe no ta permisibel ta cu ta priminti pueblo un solucion cu ta introduccion di castigo minimo y despues keda sin haci esaki pero ta introduci mas aumento di castigo maximo.

E gobierno aki  mester caminsa haci loke nan bisa y bisa loke nan haci,” Parlamentario Robert Candelaria a declara.