fbpx
Edit

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Richard Arends: Despues di sosten financiero mester bin sosten economico

E normal nobo lo ta substancialmente diferente na e situacion prome cu maart 2020. No solamente den cantidad di bishitante y vuelonan compara cu loke nos tabata conoce anteriormente, pero tambe den e efecto economico lento cu esaki lo trece cun’e. “Dependiendo con largo e recuperacion aki lo ta y na ki intensidad, esaki lo tin efecto pa e mercado laboral, sobrevivencia di comerciantenan y recuperacion di nos economia por lo general,” Parlamentario Richard Arends a indica durante conferencia di prensa semanal di fraccion di AVP. “Despues di e sosten financiero financia pa Hulanda, Gobierno no a presenta ningun plan riba termino cortico con lo duna sosten economico na momento cu frontera habri.”

“Tur actor ta haciendo nan maximo esfuerso, pero obviamente no por garantisa un vacacion liber di COVID-19, mirando cu na momento cu habri frontera, e riesgo di contagio ta aumenta drasticamente. Ta sumamente importante pa maneha e expectativanan: no solamente den area di salubridad, pero tambe den ambito di recuperacion economico. Reapertura di nos frontera no ta sinonimo y cu nos lo bay bek na e normal cu nos tabata conoce y si e dura mas largo lo e por tin efecto riba comercio y riba mercado laboral,” Parlamentario Richard Arends a declara.

“Especialmente e aspecto laboral un punto cu mester wordo discuti, como tambe sosten na empresanan cu a sa di wanta cabes riba awa. Si recuperacion di hotelnan ta lento y largo, esaki sigur lo tin implicacion pa cuponan di trabou paden y pafor si sector hotelero riba termino largo. Nos no a tende gobierno atende cu e punto aki ainda. En berdad aworaki tin sosten financiero y mantencion di cuponan di trabou pa medio di subsidio di salario, pero nos sa cu esaki lo no dura mesun largo cu e recuperacion di nos economia,” e Parlamentario a subraya. “Ademas empresanan lo ta mas cuateloso cu nan gastonan, e.o. gastonan di personal.”

Parlamentario Richard Arends a enfatisa cu e puntonan aki mester bin riba mesa mirando cu ya caba sector hotelero pa medio di AHATA a indica cu nan lo cuminsa cu un nivel di ocupacion di 40% pa fin di aña y cu cu kisas aki dos aña e nivel di ocupacion lo por ta bek na e nivel di 2019. “Esaki ta encera cu e expectativa laboral di hopi empleado lo ta insigur.” E parlamentario a sa di trece dilanti cu ta puntonan cu fraccion di AVP a trece dilanti den varios reunion di Parlamento, pero ta discusionnan cu mester wordo hiba den comunidad – mescos cu ta hasi cu e aspecto di salubridad – pa por acopla e recuperacion economico cu e demanda laboral cu tin aki na Aruba.

Gobierno ta silencioso riba asistencia economico na empresanan. Aki e Parlamentario no ta refri na subsidio di salario,  pero na incentivonan pa empresanan cu a sa si wanta cabes riba awa durante tur e tempo aki y con lo asistinan den e periodo di recuperacion aki cu ta wordo premira cu lo dura basta mas largo. “Sosten financiero ta un cos, pero sosten economico na momento di reapertura ta inminente. Mientras cu e motor turistico ta start atrobe, mester por garantisa trabow, actividad comercial y pan riba mesa di e ciudadano. E empleado, e ciudadado y e comerciante lo no por sobrevivi un recuperacion demasiado largo sin tin un sosten economico debido.

Leave a Reply

Your email address will not be published. Required fields are marked *