Durante conferencia di prensa di AVP diamars mainta, e miembro di AVP, Melvin Tromp a reacciona tanto riba lider di fraccion di MEP, Rocco Tjon pero tambe riba un otro miembro di e fraccion geel, kendenan a reacciona riba loke su persona a trece dilanti siman pasa riba e discusion di integridad.
“Mi por a ripara cu lider di fraccion di MEP a declara na prensa c’un declaracion contra di lider di pratido AVP, sr Mike Eman, insinuando cu a cuestiona su integridad loke ningun momento tabata e caso.
Ta mi persona, Melvin Tromp a y ta sigui cuestiona integirdad y ta bolbe haci un apelacion riba su persona pa publica e decision di Corte den e caso civil contra su persona pa asina tur hende mira e berdad.
Por a mira cu Tjon a presenta un documento indicando cu Mike Eman mes a considera su persona integro den e screening cu e mester a pasa pa bira director di KIA pero aki atrobe Tjon ta trata di troce berdad ya cu den un caso di screening asina, e departamentonan ta bay controla diferente aspecto pero den esaki casonan civil no ta bin al caso.
Tjon sa esaki masha bon pero na luga cu e bin hunga mooi weer e lider di fraccion di MEP mester mustra prensa e decision di Corte den e caso civil ey pa asina tur hende lesa pa nan mes y stop di hunga weganan cu no tin sentido.
Mi ta bolbe bisa Rocco Tjon ora cu e kier mishi of pone integridad di otronan na duda, e percura pa su propio integridad ta intacto y den e caso aki su persona ta bon na altura cu esaki no ta e caso.
Na mes momento nos por a ripara un miembro di fraccion di MEP, manera un barbulet c’un hala so, a dicidi di defende su lider di fraccion, a papia di sishi y porco, na luga di puntra su lider di fraccion pa aclaracion riba loke mi a trece dilanti.
Sinembargo ta bon pa e tipo aki realisa cu ora e kier yama otronan pa shishi y porco, e wak su fatsoen den spiel, prome cu e tribi di yama un otro pa porco.
Bo ta sinta manera un mucha manda, ta cuestiona y insulta cualkier persona cu tribi di cuestiona un miembro di bo partido sin cu boso ta cumpli cu loke boso a priminti pueblo, esta di controla gobierno manera mester ta.
Un set di mucha manda ta formando e fraccionnan cu ta sostene gobierno y practimente e tres fraccionnan no tin autoridad, no tin poder riba gobierno ya cu nan a presta nan mes pa sirbi gobierno na luga di sirbi pueblo,” Melvin Tromp di AVP a declara.