Awe Minister mr. Andin Bikker a culpa DIMAS pa un otro supuesto “eror” cu un entrenado deportivo. E mandatario tin un record di culpa su departamentonan pa tur su decisionnan, su maneho y e forma con diariamente e ta desvia di su maneho. E departamentonan no sa mas ki direccion bay, pasobra e maneho di Minister Andin Bikker ta “flip flop”.

 

Na cuminsamento el a pega un barco ora a laga un pedofiel den libertad prome cu ora, el a culpa KIA. Un rato despues el a comete e mesun eror, culpando e biaha ey Ministerio Publico. Polisnan a saca potret di ilegalnan manda pa Prensa, el a culpa Polis. Warda nos Costa a topa yen ilegal na un di su sponsornan principal, el a culpa Warda nos Costa. Y awo….cu e mes a desvia di su mesun maneho pa complace un coach Venezolana, el a culpa DIMAS.

 

“No ta resta mucho departamento pa e Minister culpa awo, pasobra un pa un el a culpa tur. Straño pasobra normalmente un Minister ta defende su departamentonan. E Minister ta e prome yama pa cuida e reputacion y integridad di su departamentonan. Pueblo mester tin confiansa den su departamentonan hudicial pa nan por funciona bon y e Minister mester cuida esey”, segun Parlamentario Candelaria.

 

Mas leu e miembro di Parlamento a sigui bisa cu “Claro cu por tin cosnan pa drecha den un departamento, pero pa Minister Bikker keda sali constantemente y culpa tur departamento pa tur eror pa purba di sali ileso, pueblo ta puntrando su mes seriamente si no ta e Minister ta esun cometiendo e erornan. Den e caso di Andin Bikker, na un forma delibera e ta benta su mesun departamentonan bou di bus….basta e sali ileso”.

 

E ta berguensa cu un Minister di Husticia ta sali tur siman den prensa pa culpa mundo henter di SU maneho, di SU decisionnan y di SU fracasonan. “Mi ta ripiti, mi a duna Minister Bikker beneficio di duda, siendo un abogado respeta, pero awo tur dia mas y mas ta ripara cu e no ta logrando den e funcion aki. E sapato ta mucho grandi pa e Minister, cu kisas e kier ta un Minister pero ta por e no por maneh’e”, di acuerdo cu miembro di Parlamento Robert Candelaria di AVP.