Parlamentario di fraccion di AVP, Sr. Richard Arends, a elabora riba e protocol cu a wordo firma diabierna ultimo. Na mes momento a hasi un comparacion detaya y duna e contexto den cua e protocol aki a wordo firma, compara cu e protocol cu a wordo acorda na aña 2015.
Sr Arends a mustra cu e acuerdonan cu a yega na 2015 tabata regla normanan obhetivo cu presupuesto mester a cumpli cune, como tambe e cuadro legal di e supervision financiero cu a resulta den un ordensansa nacional y creacion di un organo den cuadro di articulo 52 di Statuut.cu a wordo nombra CAFT cu su compentencia nan ancra den ley.
Tabata un acuerdo specificamente entre gobiernonan cu un distincion estricto riba ki competencianan di Reino versus esunan di Pais, como tambe te na unda por a yega na acuerdonan cu un otro gobierno den Reino riba asuntonan netamente di Pais Aruba. Aki a tene cuenta cu reciprocidad y interesnan mutuo, parlamentario Richard Arends a splica.
“Nos a traha den cuadro di nos estado di derecho, nos constitucion y di Statuut y nos a haci uzo hopi di consehonan huridico di expertonan manera Cees Borman y tambe di dr Mito Croes (dfm). E acuerdo di aña 2015, como tambe e ley actual di supervision financiero LAFT tabata cumpli cu tur rekisito di nos constitucion, pero tambe e tabata tin un lugar den e cuadro legal cu Statuut ta duna nos,” Parlamentario Arends a sigui mustra cu awe por tuma nota cu e protocol cu a wordo firma ta contene condicionnan adicional. Ademas di e normanan ancra den ley di supervision financiero, e protocol nobo ta contene condicionnan adicional cu ta duna competencianan adicional na CAFT sin base legal.
No solamente mester yega na normanan nobo, a acorda explicitamente cu colegio di supervision financiero lo duna su recomendacionnan riba con Gobierno ta yega na e normanan aki. No por conclui otro cu e efectonan di e acuerdo aki ta mucho mas invasivo cu e supervision nos a conoce for di 2015, Parlamentario Richard Arends a splica.
“Hecho cu gobierno no tin mag di sera acuerdonan di publico-priva ta un limitacion pa escohencianan politico y di maneho. Proyectonan PPP no ta solamente proyectonan infrastructural of urbano, pero tur otro cooperacionnan publico-priva manera e edificio ‘Manchi Engelbrecht’, unda Belastingdienst y Directie Financien ta situa, como tambe edificio di ATA y Raad van Advies. E protocol lo prohibi gobierno tambe pa ta sera un acuerdonan cu Monumentenfonds pa rescata monumentonan, of construi un facilidad penitenciario nobo manera cu minister mes a anuncia. E parti mas invasivo, ta cu a acorda ta cu gastonan structural por wordo cubri unicamente cu entradanan structural. Dividendonan, inhaalacties, pagonan cu ta drenta a base di maneho nobo, of entradanan cu no ta sosode tur aña pero si ta logra pa gobierno cumpli cu su metanan, no por wordo uza pa paga gastonan strtuctural di Gobierno, manera salario, contribucionnan na AZV, interes. Entradanan incidental solamente por wordo usa pa cubri gastonan incidental.,” Parlamentario Richard Arends a splica. “Irespecto di e signatura politico, ta na cada Gobierno pa dicidi con fondonan publico ta wordo aloca y pa Parlamento duna autorisacion y aproba esaki”
