‘Pone man na bo curason’ ta un dicho cu ta wordo usa den hopi ocasion y cu ta pidi un hende of instancia pa tene duela di un otro pero pa gabinete Wever Croes, ta parce cu e dichi aki no ta existi.

Lider di fraccion di AVP, sr Marlon Sneek ta señala cu no solamente pueblo ta sinti e dolor di medida tras di medida di gobierno di prome minister Evelyne Wever Croes, pero loke ta mas tristo ta e hecho cu den pueblo ta reinando un aire di tracion, di un gobierno cu a priminti cosnan bon, pero a bira suta pueblo cu medida sin misericordia.

“No ta basta cu e gobierno di coalicion aki a dicidi di ranca 130 miyon florin for di pueblo cu aumento di BBO, riba dje a dicidi awor cu pueblo mester bay paga pa recogemento di sushi caminda un minister lo ricibi 10 miyon extra pa e haci y deshaci cu esaki.

Na momento cu tin dirigentenan cu no ta compronde e dolornan di pueblo, ta surgi e tipo di situacionnan cu tin for di 10 luna caba aki na Aruba, esta cu cada dia placa den cartera di pueblo, ta birando menos y gobierno ta hayando mas pero sin cu tin indicacion algun, cu pueblo lo bay beneficia di su propio placa.

Ultimo dianan a Sali na cla cu pueblo lo bay wordo confronta cu aumento di awa y electricidad ya cu e maneho cu gabinete Wever Croes a dicidi di impone den su plan di gobernacion cu no ta existi, ta mustra mas riba un atraco c’un plan di maneho cu ta sirbi interes general di nos pueblo.

Tur loke e gobierno aki a pone man ariba, ta bayendo rumbo robes y for di tur luga of triki cu nan por pensa pa ranca placa, nan ta haci esaki, tanto for di WEB, Elmar, RdA, Bnco Central, dor di dividendo y aki ta papia di miyones di florin.

Fuera di esaki tin e aumento di BBO, e decision di bay cobra pa recoge sushi, aumento di accijns riba gasolin, decisionnan cu a percura pa aumento di productonan di prome necesidad, manera pan y otro cosnan caminda apesar di tur e medidanan aki, pueblo ainda no a ricibi ni un debchi di e placanan aki.

Minister Presidente awor ta grita cu su gobierno lo no permiti aumento di awa y coriente pero ta su gobierno a dicidi di saca miyones di dividendo di e compania aki, a hinca e compania den problema dor di no hedge ora cu mester a haci  esaki y nunca pero nunca a cumpli cu su promesa na pueblo, cu lo bay baha awa y coriente.

Ta e gobierno aki a papia di tira kabel te na Colombia pa haya  coriente y gas mas barata, cu lo bay cumpra gasolin mas barata y lo baha prijs di gasolin pero awor por mira cu loke pueblo tabata paga antes pa un tanki yen, awendia e ta yega na mita pa mesun prijs.

Pueblo no ta hayando nada pero absolutamente nada for di e gobierno aki, pero ora cu mira bon, ta sigui tuma hende den servicio, ta sigui percura pa sponsornan haya nan regalo, ta percura pa famia y amigonan haya trabou y ta bay inventa creacion di departamento nobo caminda lo bay acomoda hendenan cu awe ta consehero y coordinado.

E hende no ta central pa e gobierno aki, ya cu den 10 luna ainda e hende ta riba e ruta di medida di e gobierno aki, sin por cu por mira cu lo tin alivio na caminda.

A priminti pensionadonan cantidad di cos, pero a impone cobransa extra di Serlimar pa nan bay paga, a priminti reduccion di edad di pension pero awor por scucha Prome Minister papia cu hendenan por traha te cu 66 of 67 aña, lubidando kico el a priminti nos hendenan grandi durante di campaña.

Minister di Asuntonan social tin algun luna caba c’un suma di 17 miyon riba su presupuesto pa drecha e situacion social pero ta conta storianan cu e mes no ta kere aden y e situacion social ta sigui empeora den comunidad.

Unico caminda cu e hende ta central pa gabinete Wever Croes, ta central den e pakete di medida di su gobierno y ningun caminda mas,” lider di fraccion di AVP den Parlemento, Marlon Sneek a declara.