Diasabra 15 di augustus Plataforma pa Hobennan Profesional (PHP) lo inicia cu un tienda di ley, pa asina por brinda servicio legal di un forma gratuito na e comunidad di Aruba. Banda di e aspecto huridico lo tin algun servicio adicional cu PHP lo ta brindando.

 

E asistencia huridico cu Plataforma pa Hobennan Profesional lo ta brindando ta consisti di entre otro: compila carta di obheccion of beroep riba decisionan tuma door di gobierno, yudansa pa yena of controla peticionan/documentonan dirigi na instancia di gobierno (por ehempel dimas, dow of aanvraagvergunning), conseho huridico riba casonan simpel (por ehempel riba caso laboral) y brinda informacion general na e publico. Adicionalmente lo yuda ciudadanonan interpreta documentonan official cu nan a ricibi di instancianan gubernamental of otro instancia. Di e forma aki e ciudadano ta mihor informa di kiko exactamente ta wordo pidi of informa na su persona.

 

Loke PHP lo ofrece tambe ta asistencia den traha curriculum vitae (CV), resumes, cartanan di solicitud of yuda aplica pa trabou online. PHP lo zorg pa e ciudadano haya su carta y of cv geprint pa asina e por sigui su proceso.

 

Plataforma pa Hobennan Profesional (PHP su intencion ta pa duna un man na e ciudadano cu pa un motibo of otro no tin e luho di haya e yudansa aki. E no ta e intencion di Plataforma pa profila su mes y remplasa ningun profesional cu ta eherce e trabou di representa nan clientenan den corte. Nos plataforma lo no hasi distingshon den bo idiologia of color politico, pero simplemente brinda servicio comunitario profesional asina di e forma aki cada un miembro di Plataforma tambe por expande nan conocimento huridico door di combina doctrina huridico cu un poco cu loke ta sosode diariamente den nos comunidad. Asina tambe Partido AVP ta juda un y tur sin destinccion politico cu yenamento di papelnan belasting. Si tin casonan cu ta cai mas leu di nos competencia of conocemento, lo nos informa e ciudadano tambe manera debe ser. Plataforma pa Hobennan Profesional (PHP) ta spera di por conta cu e sosten moral of apoyo cu conocimento pa cu e Tienda di Ley.

 

Invitacion general ta bai na tur ciudadano cu lo tin e deseo di wordo yuda of tin cualkier pregunta pa asisti na e Tienda di Ley cu lo inicia dia 15 di september pa 2 pm – 4 pm na Cas di Partido AVP na Playa. Tambe e invitacion ta bai na tur profesional of studiantenan cu lo desea di yuda Plataforma cu e servicio comunitario aki.