Parlamentario, drs. Mervin Wyatt-Ras durante conferencia di prensa di partido AVP a gradici na prome luga pa e votonan pa partido y pa su persona, apesar cu tin ainda discucion encuanto e cantidad y proceso di conteo.
Durante e conferencia di prensa diahuebs mainta, MervinWyatt Ras na prome instante a toca e tema riba e hecho cu kier a bin cu sistema electronico y pa scan.
Na mes momento tambe el a mustra riba e hecho cu no kier a otorga e kiezersregister na partidonan caminda durante votacion por a ricibi solamente nomber pero no otro detayenan locual a haci un control riba erornan casi imposibel.
“Banda di esey tabatin decisionnan tuma encuanto validez di formularionan di voto cu tabata tuma dor di voorzitter di urna sin cu esaki tabata cuadra tur caminda.
Tur esaki a haci cu tin casi 900 voto di AVP cu ta invalido y aki a dicidi pa pueblo colecta firma y a logra 3000 firma pa haci posibel cu por bin reconteo.
Mientrastanto e presidente di e conseho electoral, sr. Glenn Thode di antemano a declara cu ya caba tabatin reconteo y cu e no lo haci esaki.
Durante e reunion diaranson mainta den sala na Censo, a bira obvio cu sr .Rene Herde, kende a bay pa entrega 3000 firma di ciudadanonan cu ta pidi reconteo, no a ser permiti pa drenta e sala. E motibo cu a duna ta precaucion pa COVID.
Ley di kiesverordening ta indica den articulo 82 cu como votado e tabatin posibilidad di entrega firma, loke no a ser permiti. Segun artikel 84 di kiesverordening den session di hoofdstemburo, cualkier votado por pidi reconteo di votonan. E hecho cu a conta e votonan diabierna, no ta nifica cu no tin derecho di pidi reconteo atrobe.
Esey ta un derecho fundamental democratico y pesey interpretacion di Thode no ta corecto. Ademas Thode no a consulta cu miembronan di Hoofdstemburo di Conseho Electoral y pa motibo ey e no por dicidi riba su mes.
Pues no tin autoridad pa dicidi riba su mes y e mester delibera cu miembro di consheho electoral y nan ta 5 miembro.
En bista cu a keda para riba un no relaciona cu e peticion sr. Herde, lo comtempla pa lanta un caso y lo keda na hues pa dicidi.
Wyatt-Ras ta lamenta cu nos ta bay den direccion di paisnan dogmatico y dictatorial manera cu tin den nos region y nos pueblo no custumbra di ser trata di e forma aki y tur esaki ta cuadra si den e forma cu nos a ser trata durante casi 4 aña di gabinete Wever-Croes.
Ademas por menciona e forma con lo bay yega na forma e siguiente gobernacion caminda henter e asunto di pandemia a wordo usa den bentaha di e politiconan den gobernacion, sin tene cuenta cu comercio ni pueblo.
Ora ta trata di nan, si tur cos por y sin mondkapje pero en todo caso nos lo mira den ki direccion esaki lo sigui,” Mervin Wyatt Ras a declara den conferencia di prensa.
