Un di e temanan cu awor ta keda un interogatorio grandi cu e decisión di Electorale Raad pa no haci reconteo di e votonan cu a worde cualifica invalido ta e pregunta rond di e forma con a cualifica votonan como invalido. Ta trata di casi 900 voto, pa ser exacto 893, mas hopi den historia di Aruba. Locual a resalta den e información rond di e votonan cu a worde cualifica como invalido ta votonan di partido AVP. Pa e motibo ey e partido a haci un investigación rond di e asunto y a descubri un inconsistencia den e manera cu a huzga si un voto ta valido of invalido. Durante e sesión pa trata verificación di elección 2021 e partido pa medio di su representantenan a entrega na Electorale Raad copia di corespondencia digital cu tabata tin entre diferente stembureau y Censo pa por dicidi si e votonan ta valido of invalido.
Den e pruebanan cu partido AVP a entrega por a mira cu votonan cu tabata pasa e ronchi di otro partidonan ta worde considera valido y esun di AVP como invalido. E cantidad di casonan asina tabata masha hopi mes. E diferencia di voto den e elección aki di únicamente 53 voto por a cambia e resultado den 8 pa AVP y 8 pa MEP. Mirando e diferencia chiquito aki y e cantidad disproporcional di votonan cualifica como invalido di AVP y e inconsistencia den e criteria cu a worde aplica e decisión di Electorale Raad pa no permiti reconteo di e votonan invalido ta laga un nubia hopi scur sin presedencia den historia di Aruba riba e elección 2021.
