Pa oranan largo gabinete Wever Croes a presenta su relato pa loke ta maneho di presupuesto 2018 na Parlamento diahuebs mainta pero na final di e reunion por a tuma nota cu e gobierno di coalicion, no a presenta perspectiva algun pa pueblo di Aruba, lider di fraccion di AVP, sr Marlon Sneek a mustra.

Den ningun di e presentacionnan di diferente ministerio cu e ministernan ta dirigiendo, no por a scucha un solo punto positivo cu ta sirbi interes general di pueblo caminda tanto e cartera di finansa como esun di husticia, simplemente no a cumpli den ningun sentido, cu promesanan haci pa e partidonan cu a forma coalicion durante di campaña electoral.

“Un biaha mas por a scucha diferente minister papia di plannan cu nan tin, di ideanan cu  nan tin pa ehecuta, pero fuera di un pakete pisa di medida pa pueblo, ningun di e ministernan a presenta un solucion adecuado cu ta sigura pueblo cu cos lo drecha den un futuro cercano.

Al contrario, nos por as scucha tanto ministernan como miembronan di parlamento cu ta sostene gobierno, papia di temponan dificil, cu mester wanta sla pa despues bay dilanti, den un forma tratando na convence pueblo cu pueblo tin cu sufri prome cu cosnan cambia.

Tin expresionnan realmente impresionante, entre otro ora cu scucha mesun mandatarionan como parlamentarionan cu antes tabata bisa cu pueblo no por come asfalt y klinker, awor ta papia di camindanan di asfalt cu ta wordo poni den diferente bario, un  programa cu gabinete Mike Eman tabata ahecutando caba pa algun tempo.

En realidad nos tin cu bisa cu gabinete Wever Croes a usa mayoria di tempo pa atende cu e maneho di gabinete Mike Eman I y II insistiendo pa trata di logra pa pueblo mal interpreta esaki, sin duna informacion specifico riba loke nan gobierno ta haciendo pa drecha un situacion cu nan mes a bruha creando un crisis di berdad aworaki pa pueblo.

A papia di un plan social cu ainda no tin indicacion unda e ta bay cuminsa, ni con esaki ta hinca den otro y kico por spera di e plan aki, loke ta logico ya cu recientemente e Minister di Asuntonan Social ta buscando pa crea un fondo pa aloca e suma di 17 miyon cu el a pidi y haya di Parlamento pa ehecucion di e plan social aki.

Mientras cu dentro di algun dia, manera Minister di Finansa a anuncia, cu lo presenta presupuesto 2019 na Parlamento, ainda e plan social aki no tin ni pia ni cabes mientras cu problemanan social ta sigui aumenta, ta sigui crece sin cu gobierno tin solucion pa esaki manera cu el a priminti.

Pa loke ta e maneho financiero, cu tanto Prome Minister Evelyne Wever Croes a priminti pueblo cu nan tin un plan pa soluciona esaki den corto tempo, tampoco a wordo mustra kico e solucion aki ta, sino ta e plan di medida cu pueblo a haya den su scochi apesar cu pueblo a wordo sigura cu esaki lo no ta e caso.

Minister di Finansa ta conta un storia cu ta parce riba un fabula caminda e ta splica cu aumento di gasto di personal di gobierno tin di haber cu contractnan di e gobierno anterior cu ainda su gobierno no por soluciona, cu ta un asunto ridiculo y sin base.

E gastonan aki ta den presupuesto caba y ora cu CAFT of otro instancianan papia cu gabinete Wever Croes a aumenta su gastonan di personal den ultimo 10 luna, esaki ta riba cuenta di e gobierno aki y no tin nada di haber cu e gobierno anterior.

Pa loke ta ministerio di infrastructura ya caba un dia anterior e minister a yama un reunion publico di parlamento como un tipo di ‘antesala’  pa e reunion di gabinete MEPPORRED, sigurando cu e fraccionnan den parlamento lo no bin haci problema riba e asunto di Serlimar durante di e reunion publico un dia despues.

En corto por deduci cu gabinete Wever Croes no a logra nada di loke a wordo priminti na pueblo, ta papia na tur momento di solucionnan cu nan “lo tin” pero nada concreto y nada dirigi pa sirbi interes di pueblo caminda e unico regalo cu pueblo a haya, ta un pakete di medida cu a aumenta costo di bida den un forma sin precendente den ultimo simannan,” Parlamentario Marlon Sneek a declara.