Lider di partido AVP, mr Mike Eman, ta mustra cu for di momento cu den un reunion di Parlamento e Minister concerni a anuncia cu lo bay cobra e suma di 25 florin pa recogemento di sushi y AVP tin dos motibo di preocupacion
“Un di e motibonan ta cu AVP ta kere cu no ta husto pa e hecho cu gobierno di AVP dia 15 di november di 2016, den conseho di Minister a fiha e posicion di gobierno e tempo ey riba diferente tema.
Entre otro aumento di pensioen di nos grandinan cu 2.3%, aumento di salario minimo cu 2%, reducion di coriente residencial cu 15%, reduccion di tarifa di coriente comercial cu 5%, aumento di bijstand entrante 2017, tanto e normatieve uitkering cu ta subi di 407 florin pa 450 florin, familielid bijslag lo subi di 175 florin pa 200 florin, schoolkindertoeslag cu no tabata existi y cu gobierno di AVP a introduci prome na 100 florin despues a aumenta esaki na 200 florin y na januari 2017, nos a aumenta esaki na 250 florin y e margeschoolgeld uitkering cu nos tambe a introduci cu tabata 120 florin inicialment y nos a aumenta esaki na 220 florin.
Ora cu nos a mira tambe e peso riba nos conciudadanonan y e intencion di Serlimar pa bay cuminsa cobra y nos a haya un peticon e tempo ey di entre otro FTA pa mira si por yega na un tarifa social, nos a tuma e decision y mi ta mustra esaki textualmente kico tabata e decision cu a wordo tuma 15 di november 2016:
“Reduccion di tarifa di piki sushi di 25 florin pa un tarifa social di 10 florin, pa esnan cu tin un entrada bou di 2500 florin pa luna.”
Esey tabata kiermen cu tur hende cu entrada bou di 2500 florin, nos pensionadonan, nos bijstandtrekkers, nos minimumlooners, hasta minimumlooners y minimumlooners te cu 2500 florin, nos a dicidi cu nan ta bay paga unicamente 10 florin.
Ora cu nos a tende cu ta e intencion pa hasa exonera por ehempel minimumlooners, bijstandtrekkers di e10 florin aki, nos a kere cu e minister cu ta encarga awor cu infrastructura, a tuma over nos pensamento di un trato social y hasta bay ainda mas leu dor di bisa cu na lo no paga nada.
Despues di e reunion cu Parlamento nos a bin tende cu minister a dicidi hunto cu parlamento, cu mayoria sosteni pa MEP POR y RED, cu nan ta bay aumenta e 10 florin aki na 25 florin cu sigur sigur ta un peso hopi pisa pa henter nos comunidad, cu ya caba ta carga cu e pesonan di aumentonan di BBO cu awor ya caba ta traduciendo su mes den un inflacion cu lo yega 10% e aña aki.
Pa bo por yega na aumenta un prijs asina di 10 florin pa 25 florin, bo ta papiando di un aumento di mas di 100% cu nan ta introduci riba esunnan mas vulnerabel den nos comunidad.
E di dos aspecto cu mi ta haya tambe sumamente lamentabel den e forma con esaki a bay, ta cu no ta yega na un acuerdo cu partnernan social cu e ta bay ta 10 florin, anto riba bo mes bo ta cambia e posicion cu bo a acorda cu partnernan social.
Tempo cu nos tabata den gobierno durante dos termino, nos tabatin dialogo social caminda nos tabata sinta cu tur gremio, yega na acuerdo riba temanan sumamente grandi pa nos pais, temanan di reparatietoeslag, temanan di reforma di pensioen, di reforma di AZV, reduccion di prijs di awa y coriente, temanan esencial pa e stabilidad social economico di nos hendenan, introduccion di un pensioen general, y nos tabata ehecuta esakinan a pie de la letra manera cu e di dos publicacion aki ta mustra tambe, caminda tur locual ta wordo acorda den e acuerdonanan social, esaki tabata e uitwerking di nan den ley.
Den nos tempo hamas y nunca, por tabata posibel cu bo ta acorda cu gremionan social, cu ta fiha un prijs, ta fiha un porcentahe, bo ta fiha un regla, y bo ta bay haci net lo contrario di cual bo a palabra.
Si mira cu nos ta tratando aki di un gobierno cu tur e palabracionnan cu el a haci cu nos comunidad durante di eleccion, cu ta bay goberna sin medida, cu ta bay baha prijs di awa, ta bay baha prijs di coriente, ta bay baha edad di pensioen, y e gobierno ta haciendo net lo contrario di su promesanan y awe e gobierno a cuminsa haci net lo contrario di su compromisonan cu el a crea reciente cu gremionan social.
Esaki ta mustra cu e gobierno aki no tin ningun respet pa nos comunidad, no tin niun sentimiento pa esnan cu ya ta afectando nan poder di compra severamente y no tin ningun respet tampoco pa e gremionan social cu cual nan ta haci acuerdonan cune y despues di un luna ya caba nan ta kibra e acuerdonan aki,” lider di partido AVP, mr Mike Eman a trece dilanti.
