Banco Central a emiti recientemente su “Business Perception Survey, Result for the 2nd quarter 2018,” cu ta un rapport cu no a tende Minister President Eevelyn Wever Croes papia riba dje, cu no a tende Minister di Finanza Xiomara Ruiz Maduro tampoco papia riba dje.
A sconde esaki y na luga di atende resultado serio di e rapport di Banco Central ta spera cu pueblo lo no haya sa di e desaroyonan cu tin.
“E rapport cu ta trece hopi preocupacion, un rapport cu ta papia di caida di Aruba su economia, un rapport cu ta papia di perdidda di poder di compra den 6 luna, un rapport cu ta papia di perdida di confiansa den futuro di e pais pa tur esnan cu ta ‘stakeholder,’ cu ta participante y ta carga e pais aki. E survey di Banco Central ta mustra cu companianan ta raporta caida, no unicamente di nan resultadonan, pero tambe caida di nan confiansa den e futuro di e economia di nos pais.
Den apenas 6 luna, Aruba a conoce un cambio total di su destino y rumbo di e pais y ta sumamente preocupante ora cu analisa e informacion aki di Banco Central,” mr Mike Eman a splica.
El a sigui mustra cu den e survey di BCA ta haci observacion y conclusion basa riba resultado di e encuesta cu nan a haci y nos mester bay pensa kico nos por haci hunto pa para e desaroyo preocupante describi dor di Banco Central,
“Den survey di BCA ta papia di un “decrease in the overall business perception index”, pues un caida den e impresion y realisacion di resultadonan di economia di e pais. Nan ta bisa cu e indice di e situacion economico actual, a registra un caida.
BCA ta duna graficonan unda por mira cu cifranan di 2017 ta mustra positivo cu a wanta esaki te den e prome kwartaal di 2018, pero den e di dos kwartaal e cifranan a tuma un direccion cu ta sumamente preocupante pa e pais aki.
E survey di Banco Central ta indica tambe cu e indice economico a termino cortico tambe tin un caida. Tur cifra den e rapport aki cu mester bay halto pa Aruba prospera, ta mustra un caida y tur cifra cu mester bay abou, manera desempleo, pa Aruba ta un pais economicamente y socialmente sano, ta bayendo halto. Tur cos ta bay den e direccion robes.”
Tambe Eman a señala e indicador di “sales” ta bisa cu tin un caida drastico pa comercio den e 2do kwartaal di 2018. Un resultado dramatico unda cu companianan ta bisa cu nan bentanan a baha. Tambe ta señala un reduccion den plannan di inversion pa e proximo 12 lunanan. “E graficonan di BCA ta mustra un Aruba cu te na final di 2017 tabatin cifranan economicamente y socialmente saludabel, un pais stabiel. Y den e di dos kwartaal di 2018 ya caba survey di BCA ta registra un caida dramatico den e confiansa di economia di e pais aki.”
E cifranan di e survey di Banco Central ta mustra cla cu na 2017 tabatin un Gobierno y na 2018 a cuminsa un otro Gobierno. Pueblo Arubano kisas den e prome kwartaal ainda tabata den expectativa di kico e Gobierno nobo ta bay ofrece, despues di hopi promesa haci durante temporada di campaña, pero e cifranan economico di e pais den e di dos kwartaal a cuminsa cay di un forma cu nunca antes a mira na Aruba,” lider di AVP, mr. Mike Eman a declara.
