Proyecto di Fastferry cu minister Chris Romero ta haciendo propaganda pa esaki, no ta uno factibel pa Aruba, sigur ora cu haci un analisis general di e proyecto aki, segun mr Carl Giel miembro di partido AVP, a trece dilanti.
“Prome cu tur cos a analisa e mercado di biaheronan entre e islanan di Aruba, Corsou y Bonaire caminda e fastferry ta bay opera y den e caso aki e cantidad di biaheronan entre e islanan aki ta hopi stabiel y e aeroliñanan cu ta atendiendo cu e mercado aki, tin suficiente cupo pa transporta e biaheronan cu tin y nan hasta cupo te di mas ya cu nan tin cuponan cu ta resta.
Den un caso asina pa bin den e mercado di transporte di hende den un proyecto manera e fastferry, e lo tin cu bay competi riba e mercado di aeroliñanan, kiermen e lo tin cu bay kita pasaheronan di e aerliñanan, pa e ferry por sobrebibi den e mercado aki.
Ora bo ta bay competi den un mercado, bo tin cu analisa diferente factor cu ta hunga un rol den e competencia aki, por ehempel ‘speed’ ta hunga un rol, confiabilidad di e transportado, tin e prijs tambe cu lo bay hunga un rol y otro factornan cu tambe lo bay hunga un rol ora cu bo ta competi.
Ora cu nos bay wak e parti di e fastferry y c’un aeroliña e ‘speed’ den e caso aki, un aeroliña ta mucho mas rapido c’un fastferry y mi a tende cu e minister concerni ta papia di 45 minuut entre Aruba y Corsou pero mi no sa si esaki ta un di e botona di velocidad cu ta competi den competencianan di Formula Uno di boto na Merca, ya cu e distancia ey no ta wordo cubri den e 45 minuutnan aki.
Mi tin experencia personal riba esey tempo cu mi tabata forma parti di Korpsmariniers na Aruba, caminda nos a move riba un fregata for di Corsou pa Aruba, y esaki riba velocidad mas halto, ya cu nan ta usa un turbina di avion, e distancia a tuma 3 ora y mei pa yega Aruba, caminda mi no ta kere cu e fastferry lo bay usa un velocidad mas halto cu esey.
Pa bay bek riba e punto di competencia pa e fastferry, e compania aki lo bay tin cu kita pasahero for di e mercado di aeroliñanan.
Aworaki ora cu bay wak si e negoshi aki ta factibel, tin cu bay wak kico ta su gastonan di operacion, por ehempel gastonan mensual y anual, cuanto pasahero e ferry tin cu bay transporta pa e compania lo por ‘break even’ y hasta haci ganashi cu esaki.
Pues minister Romero tin cu presenta awor pa nos wak, cuanto biahero e fastferry aki tin cu bay transporta pa e por tene cuenta cu su gastonan personal, pa e por sobrebibi den e mercado aki.
Si esaki no ta e caso anto e lo bira un ‘dode mus’ den e caso aki caminda lo cuminsa c’un compania morto prome cu e cuminsa opera.
Minister Romero tambe a declara cu e proyecto aki lo ta un pilar economico pa pais Aruba y cu esaki lot a un pilar economico pa San Nicolas y den caso aki mester sa kico e ta e factornan cu ta bay haci e proyecto un pilar econmico eigenlijk.
Ora cu bo papia di un pilar economico esaki tin cu mustra cu diferente parti di nos economia ta bay ta depende di e proyecto, por ehempel tempo di e refineria cu nos ta considera un pilar economico, caminda diferente compania di construccion, diferente compania cu ta bende ekiponan di siguridad, trahadonan na cantidad cu salarionan halto cu ta draai nos eonomia.
E fastferry considerando esaki como pilar economico tin cu bisa cu e no ta pasando e test ey, ya cu mi no ta wak con e ta bay aporta na nos economia y ban pone cu e ta bay transporta pasaheronan mes, poniendo esaki den caso di San Nicolas, ora cu nos ta papia cu pasaheronan ta bay laga placa den nos economia, tin cu bay tene cuenta cu e ‘wallet share” di e pasaheronan aki.
Por ehempel si un persona ta bay bin cu 100 florin, cuanto porcentahe di e 100 florin aki e ta bay laga atras den economia di San Nicolas.
Si analisa economia di San Nicolas, e no ta suficiente diversifica compara cu e eonomia por ehempel na Oranjestad of Noord, pues e negoshinan cu e pasahero ta bay laga di su cartera, ta hopi chikito, pues eynan caba tin un factor cu ta mustra cu e no ta na fabor di esaki.
Otro parti importante ta pa haya sa kico e ta bay transporta? Ki producto e ta bay transporta entre e islanan, kico ta e productonan di transportacion, aparte cu nos ta exportando cerbes cu nos ta exportando pa Corsou y Bonaire, pero kico ta e otro productonan cu lo wordo transporta?
Pesey tin preguntanan hopi clave pa minister Romero pa e por trece claridad den esaki y di unda el a saca e informacion cu e fastferry ta bay ta un pilar economico y si e por informa pueblo cu e negoshi di fastferry ta bay ta uno factibel.
Otro punto importante ta e hecho cu e compania aki lo bay haya tereno banda di e refineria cu tin un balor economico grandi y si e compania bati bancarota despues, e terenonan aki por wordo traspasa y mester sa si ta esey ta e estrategia of si tin otro estrategianan economico patras di cortina pa cu e plan aki.
Mi tin cu conclui cu den nos concepto e proyecto di fastferry no ta factibel tanten cu e minister no trece dilanti factornan caminda e ta saca su conclusionnan con e ta kere cu e ta factibel y den nos opinion nos no ta kere cu e proyecto di fastferry ta factibel,” mr Carl Giel a declara.
