Parlamentario Ryçond Santos do Nascimento ta cuestiona e maneho di integridad di Gabinete Wever-Croes II. E parlamentario ta puntra con ta posibel cu na Censo mas cu 60.000 florin ta ser verduisterd entre april 2018 y februari 2019. Pa lunas largo fraude por a sigui tuma luga sin cu ningun hende ta ripara algo.

Ora e parlamentario ta cuestiona esaki Minister-President ta wanta informacion y documentonan atras pa impedi e parlamentario di haci un control adecua. Diensthoofd di Censo a traha un relato, referi como bijlage 1, cu Minister-President tambe a wanta atras. Sin embargo e tiki informacion ta mustra cu e diensthoofd a percura pa e controlnan di integridad normal den un organisacion, pero cu Minister-President mes a haci uso di su poder pa haci un management override of internal controls cu a resulta den un fraude di miles di florin.

Minister-President cu pa colmo tabata encarga cu integridad a dicidi pa duna un persona clave un Bijzonder Verlof van Dienst exponiendo Censo na un riesgo di integridad. Aparentemente e Minister-President no ta transparente pasobra e kier sconde cu no tin ningun maneho di integridad na nivel general di e aparato gubernamental. Esaki ta nifica cu tur papia di integridad di Gabinete Wever-Croes I ta keda na hopi scuma, poco chuculati. Pa colmo ni Minister-President ni Minister di Finansas kier duna claridad encuanto e procesonan di control na Departamento di Impuesto na unda pa por lo menos tres aña fraude a tuma lugar envolviendo mas cu 800.000 florin. Si e tipo di fraude aki por tuma lugar den departamentonan mas prestigioso di nos pais, ta con anto den e otro departamentonan?

Ta fiesta mes tin? E ministernan encarga cu e departamentonan aki kier tira tur culpa riba e personanan cu a comete e fraude, lubidando cu ta e minister ta politicamente responsabel pa e falta di maneho riba e area di integridad. E unico cos cu si nan a resulta di por maneha bon ta e campaña di mercadeo pa pone tur hende kere cu nan berdaderamente a pone bon gobernacion riba un pedestal.