Pueblo di Aruba a celebra Dia di Himno y Bandera den gran ambiente y den gran forma pero no ta tur cos a cana den forma positivo, lider di fraccion di AVP, sr Marlon Sneek a declara.

E parlamentario a mustra cu pa tristo cu e por ta, varios centro di bario y otro organisacionnan a wordo perhudica pa un decision di Minister di Infrastructura, Otmar Oduber, kende a dicidi cu e organisacionnan aki no por haya subsidio mas pa haya tentnan cu ta ser uza durante di nan actividadnan y cu nan tin cu paga pa haya e tentnan aki.

“E celebracion nacional no a bay  manera mester ta y cu den mi concepto hasta tristo ora cu nos por a tuma nota caminda manera tur hende sa, centronan di bario ta haci uzo di  celebracion di Dia Nacional pa organisa actividad pa asina haya algo di fondo pa asina nan por draai como centro di bario y cumpli cu nan agenda di actividadnan pa nan miembronan.

Ta actividadnan pa muchanan, pa hobennan, pa nos grandinan pero pa nan sorpresa ora cu nan a yega pa busca tent pa nan pone riba nan tereno pa pone wega bou di esakinan, traha nan bar- y cushinanan pa por yega na nan fondonan, nan a wordo sorprendi formalmente e biaha aki.

Ta resulta cu Minister di Infrastructura sr Otmar Oduber a tuma e decision cu no ta duna e tentnan aki mas como donacion, algo cu semper manera nos sa riba presupuesto di DOW ta costa placa caminda cada tent ta 75 florin pero semper  pa e actividadnan social aki tabata duna nan como donacion, pues pueblo ta paga pa e centronan di bario por haya e tentnan aki pa por haci mesun actividadnan aki pa pueblo.

E aña aki a haya e sorpresa cu si nan kier tent pa un actividad nan tin cu paga pa esaki y riba dje nan tin cu paga un tipo di borgo pa asina nan haya e tentnan aki pa fia y ta di lamenta cu for di gobierno, caminda mester stimula cu nos ta bay celebra un fiesta grandi asina manera nos Dia Nacional, gabinete Wever Croes ta obstrui, ta stroba un centro di bario cu den parti ta biba di contribucion.

E aña aki  nan a wordo confronta pa e hecho riba Dia Nacional, nan no ta haya un tent for di gobierno como donacion caminda nan por a fia esaki y pone pa asina haci nan actividad, pero minister a dicidi cu nan tin cu paga pa esaki y ta algo sigur di condena ya cu pa añanan largo esaki tabata e caso.

Nos por corda hasta for di tempo di Minister Ramon Lee kende hasta tabata duna cada centero di bario of organisacion cu tabata organisa un actividad, sea un knock-out di softball of cualkier otro actividad rond di dianan nacional,  nan tabata ricibi hasta un contribucion financiero di gobierno pa por haci nan actividadnan.

Awe pueblo por mira con minister di infrastructura ta dicidi cu un tent di 75 florin no por wordo duna na centronan di bario pero si nos por a mira con gobierno ta pone un helikopter bula y haci show riba Plaza Betico Croes, caminda pa e show aki e helikopter a costa un paar di mil florin na fuel y esunnan cu mester maneha esaki.

Ta di lamenta ya cu supuestamente a busca un helikopter pa atende asuntonan di siguridad y awor por wak cu ta usa e aparato aki pa haci show, djis pa demostra cu gobierno a bin c’un helikopter, anto e pober centronan di bario cu mester di e actividadnan aki pa por genera algo di fondo pa organisa programanan pa nos propio hobennan y asina garantisa cu nan no ta bay den mal caminda, pa nos grandinan pa nan no ta cera na cas y por atende un actividad, minister ta bira corta den esaki y laga nan su tent pero pa pone un helikopter haci un show, eynan si tin placa.

E cos aki sigura ta di condena y nos ta bay trece esaki dilanti pa mira kico por wordo haci pa yuda e centronan aki den nan intento pa crea nan propio fondo pa maneha e luganan,” Parlamentario Marlon Sneek a declara.