Minister di Infrastructura siman pasa ta manda un carta pa Parlamento bisando cu e kier un reunion publico pa duna un splicacion con leu cu e ta cu e problematica di sushi y pa e splica e motibo di su decision pa cobra pueblo pa cobramento di sushi, Parlamentario di fraccion di AVP, Benny Sevinger a mustra.
El a sigui mustra cu ora cu e Minister pidi un reunion publico, cual no ta normal pasobra ta Parlamento ta yama reunion publico. Minister por bisa cu e kier bin duna un presentacion y Parlamento ta esun cu ta dicidi si ta den comision central of reunion publico esaki lo tuma luga.
Pero Minister a bisa cu e kier un reunion publico pa e haci show riba fraccion di MEP un biaha mas y e reunion aki a wordo yama, y fraccion di AVP a asisti pero na momento cu AVP a bisa e Presidente, cu ta e Minister a pidi e reunion y cu ta su persona mester cuminsa papia, dunando su presentacion, pa nos haci pregunta.
Sinembargo sr Sevinger a mustra cu no tabatin oido di parti di Presidente di parlamento, pasobra e no tabatin e acuerdo di su fraccion.
“E reunion a cuminsa y na momento cu fraccion di MEP mester a haci pregunta, nan no por a haci mucho pregunta, pasobra e Minister no a duna ningun splicacion.
Ta despues ora cu e Minister a cuminsa duna su splicacion, e ora ey parlamentarionan por a haci pregunta y e splicacion cu e Minister a duna, ta cu el a tende e fraccion di MEP y kisas el a trece un maneho mucho lihe, pero ta un maneho cu el a palabra cu e sindicatonan cu ta cobra 90 florin pero cu e ta dispuesto pa reconsidera esaki y hacie 25 florin flat.
Eynan por wak con fraccion di MEP ta sali bisa despues cu “nos a logra, nos a baha di e cobransa di 90 pa 25 florin” pero shonnan, e tabata 25 caba.
No solamente e tabata 25, pero e tabata 25 pa esunnan cu por paga y 10 pa esunnan cu ta den un posicion cu no por paga un suma mas halto. Tambe tabatin un parti cu mester subsidia pa esunnan di onderstand,y nos grandinan cu no por paga.
Esey a wordo palabra den e ultimo Consehonan di Minister di Gabinete Eman II. Esey tabata loke cu SERLIMAR tabata ehecuta, caminda tabata manda e cobransa ey pero fraccion di MEP e tempo ey mes a bisa pa no paga y no tabatin mucho entrada ta drenta for di cobramento di sushi.
Esaki tabata 1 miyon na 2015 y 2 pa 3 miyon den e añanan siguiente pero realidad ta cu e 2 pa 3 miyon ey tabata extra riba loke SERLIMAR tabata haya caba for di presupuesto di pais Aruba! Consecuentemente placa di pueblo cu e tabata haya di 22 miyon, awo ta bay implementa e cobransa nobo den Grondbelasting pa tur hende por paga, riba e medidanan nobo cu Gobierno a tuma caba. Kico ta e diferencia.
Sr. Minister a bisa cu e ta cobra 90 florin y e lo a percura pa un entrada di 11 miyon. Ora bo conta e 31 mil hendenan cu tin cu paga na 25 florin, e lo trece 10 miyon florin aden.
El a pasa MEP un fastball caminda el a reduci un miyon florin di entrada, sin cu el a bay na e sindicatonan, sin cu tabatin un dialogo unda cu antes a palabra cu esunnan menos afortuna ta paga menos pero fraccion di MEP a keda sumamente contento cu e manipulacion aki,” Parlamentario Benny Sevinger a mustra.
