Lider di partido AVP Mike Eman, hunto cu miembronan mr. dr. Rycond Santos de Nascimento y mr. Ichelle Simon di Fundacion Digna Lacle-Herrera a anuncia cu pronto ta start cu e siguiente curso. Eman a splica cu e atendencia pa loke ta e otro cursonan tabata hopi grandi unda por a nota presencia di miembronan di otro organisacionnan politico. Esey ta algo positivo y di aplaudi. “Nan a sinti nan mes comodo pa yega Cas di Partido y participa na e cursonan.” Eman a haci uso di e oportunidad tambe pa felicita prensa cu nan dia riba 1 september. E tabatin masha hopi palabra di elogio pa e trabou cu prensa a bin ta haciendo.
Lider di e partido mas grandi na Aruba Mike Eman a trece padilanti cu Cumbre’18 di partido AVP tabata un exito y un di e puntonan evidente ta e envolvimento di hobennan cu tin e tarea importante di yuda bin cu pensamentonan nobo, pa crea energia y visionnan cu ta basa riba cada generacion cu tin cu yuda carga e futuro di pais Aruba. “E plataformanan crea door di AVP ta contribui grandemente na e pensamentonan cu partido ta formula pa su siguiente periodo di gobernacion. Tambe pa su Parlamentarionan por fundamenta y carga – aunke den oposicion – nos vision y ideanan cu continuamente ta wordo sosteni pa estudio y investigacionnan haci y trabounan di research cu partido ta haci, den cooperacion cu otro institutonan cientifico rond mundo.”
Instituto Digna Lacle-Herrera su tarea ta pa entre otro prepara politiconan hoben y nobato den nan formacion. Eman: “E aña aki partido a cuminsa cu tres diferente curso. Na mei a start cu ‘Constitutie & Parlementair stelsel’ cu a wordo duna door di mr. dr. Rycond Santos do Nascimento na unda un cantidad grandi di 70 cursista a participa y na final di e prome parti aki 60 a haya nan certificado. E di dos parti a sigui mesora cu tabata ‘Grondrechten & Rechterlijke macht’ na unda un otro cantidad di 50 pa 60 cursista a logra haya nan cerificado. Nos ta aki awe pa anuncia e di tres curso cu ta ‘Bestuurlijke besluitvorming & Bestuursrechterlijke rechtsbescherming’. E ultimo aki ta un parti hopi importante. E ta bay over e relacion di e ciudadano y e gobernacion di un pais. Kico ta e reglanan na cual e gobernacion mester atene su mes na nan na momento cu e ta tuma decisionnan cu ta regarda ciudadania di un pais.”
E curso ta cuminsa otro siman diahuebs, dia 13 di september, e siguiente ta 20 di september, 27 di september, 4 di oktober y 11 di oktober 2018. Nan ta wordo duna na Cas di Partido na Playa for di 7’or pa 9’or di anochi.
