Parlamentario drs. Mervin Wyatt-Ras ta lamenta e forma di proceder “onrechtmatig” di minister di Finanzas Xiomara Maduro y Minister di Asuntonan General, Evelyn Wever Croes y henter Ministerraad pa cu otorgamento di “overbruggingstoelage”. E parlamentario a haci pregunta tambe encuanto e hecho cu a duna cierto parlamentarionan “dienstverleningsovereenkomsten” ora nan nan a finalisa nan termino den constelacion anterior, siendo cu nos pais no tin placa.
“Nu komt de aap uit de mouw”, Wyatt-Ras ta expresa.
E ley encuanto beneficionan di politiconan ta encera dos articulo Ia. y II. E ley cu a ser presenta ta pa otorga “overbruggingstoelage” mas tempran cu e ley anterior. Ademas ta haci esaki retroactivo. Sinembargo ya caba e suma a ser paga dor di e minister. Segun Wyatt-Ras netamente den pandemia den cual hopi cuidadano tabata y ainda ta den situacion dificil sin placa ni pan pa pone riba mesa di nan famia y cu no tin ningun sosten, no ta corecto ni acceptable pa gobierno en contra di ley a duna “overbruggingstoelage” adelanta na su mes como ex-ministernan y parlamentarionan.
Wyatt-Ras a trece padilanti cu el a tuma nota cu Ministerraad a dicidi dia 13 juli 2021 pa paga politiconan “overbruggingstoelage”, anticipando cambio di ley pa regla fecha di pago di e “overbruggingsuitkeringen”. Kiermeen henter e coalicion a dicidi pa nan propio convenencia sin tene cuenta cu otro hende of cuidadanonan cu ta den mesun situacion pero no tin ningun hende pa yuda nan.
Wyatt-Ras ta di opinion cu mescos cu gobierno por a bin urgente dos siman pasa pa no mester duna (semi)ambtenaarnan 12.6% bek di nan salario e por a bin mesun urgente pa e pago di “overbruggingstoelage”. Sin embargo por constata cu aunke cu a tuma decision 13 di juli den ministerraad ta te 27 di oktober 2021 a manda pidi conseho di Raad van Advies.
E minister di Finanzas a desvia di ley a dal bai y haci pago illegal. Aki e y su gabinete ta full fout. E ta defende su mes di indica cu ta trata di un “begunstigend beleid” pa evita caida abrupt pa entrada di politiconan.
E pregunta di Wyatt-Ras ta kico lo mester haci e ora pa cuidadanonan cu no tin sosten di ningun hende of famia?
Dicon e minister no a bin Parlamento of manda un carta pa Parlamento pa notifica Parlamento.
Ki ehempel minster di Finanzas y Promer Minister ta duna? Ta paso nan ta sigur cu nan ta haya sosten di nan “Stempel Parlement” nan ta comete tal actonan di ilegalidad. Ta un berguensa cu gobierno cu ta kitando 12.6% di salario di ambtenaarnan tur luna, ta tuma medida den cuido di pashentnan, a pasa un LB den stoma di pueblo pa paga “eigenbijdrage” paga pa medicinanan, ta tuma decision pa beneficia su mes y politico.
Awor cu e minister tin miedo cu su wowo lo por blink den KIA of cu Hulanda lo bin pon’e bou curatela e ta core bin cu e ley. Ta ken e lo a consulta cun’e pa por a tuma tal decision?
E proceder aki ta parse forma con a trata cu FASE pa cual Algemene Rekenkamer a tik gobierno op de vingers. Igual kier a haci cu sociaal crisisplan. Riba insistencia di fraccion di AVP y CAft finalmente a legalisa e fondo di crisisplan. Pues e gobierno aki no ta worry cu reglanan ni cu ley pero si kier yama su mes integro.
Segun Wyatt-Ras e minister di Finanzas y su boezem vriendin Evelyn Wever-Croes kende a companj’e den reunion, ta grita y ta yena nan boca di e palabra integridad, mientras cu nan no ta tene nan mes na ley/reglanan. Integridad no ta un palabra sino tin cu bibe y actua segun pricipionnan di bon conducta y gobernacion.
Te fresco den memoria di Wyatt-Ras con minister di Finanzas y e Minister Presidente tabata grita den Parlamento ora ken cu ta haci ki cu ta y e ta sali con cu ta. Awe e palabranan ta pas pa nan mes. Esaki ta conta tambe pa e rapport “feestvierend ten onder gaan”. Awe nan mes ta carga consecuencia di e trampa cu nan kier a traha pa AVP. Awe ta nan ta “Feestvierend met COHO ten onder gaan”.
Awor e dos ministernan aki no por papia mas cu nan ta para pa “deugdelijkheid van bestuur” y no por yena boca grandi cu integridad y awor e minister di Finanzas mester guli su palabranan y papia cu un “toontje hopi mas lager” cu antes.
Tempo cu a pasa “Versoberingswet” den Parlamento na anja 2010 pa kita beneficionan di politiconan por corda con e minister di Finanzas no a “sostene Versoberingswet”. E kier a mantene tur su beneficionan. Y awor por mira atrobe e ta aumenta beneficionan di politiconan, pa no papia mes di su auto di coriente geleased cu placa di pueblo cu e ta plug na Kokolishi y gasta coriente di pueblo. Mervin Wyatt-Ras ta senjala cu ora a pasa e “Versoberingswet” na anja 2010 e minister presidente a sali core bai pafo pa e no vota. Paso ora cos ta cayente e ta bula afo. Kiermeen e tambe tabata pro pa mantene tur su benefishinan y pensioen di politico.
Despues nan dos a para hunto pa saca Lopez-Tromp y Wyatt-Ras foi partido, kendenan si tabata pro pa kita e beneficionan y a para hunto cu pueblo.
Segun minister Maduro y Wever-Croes e politiconan no tin “fall back positions” pesey mester a paga nan tempran. Pero what about nos pueblo? nos pueblo tampoco no tin “fall back position”. Durante reunion ambos minister a keda inventa tur sorto di smoesjes pa defende nan eror. Smoesjes pa privilegia nan mes.
Segun nan 2 minister y 13 parlamentario a haya e Pago y tambe admiti cu a duna nan coleganan dienstverleningsovereenkomsten pa yuda nan. Bunita hancho pa nan y smal pa otro.
Wyatt-Ras a coregi e boezemvriendinnen Maduro y Wever-Croes paso Wyatt-Ras no mester wanta palabra di groseria. Ora Mep a sak’e for di partido pa medio di 2 carta bispo di Pasco 2010 y bispo di Anja Nobo 2011 y a tir’e for di cura el a lanta para y sigi cana y e ora el a drenta den otro partido. E no a bula cura sino MEP a tire foi di e cura. Wyatt-Ras a coregi e boezemvriendinnen. Mientrastanto Evelyn Wever Croes cu ni a vota manera a ser protehi dor di su partido. Eynan mes por mira cu Mep ta un partido unda tin diferencia di clase.
Wyatt-Ras hunto cu fraccion finalmente a vota contra di e concepto di ley aki. Alabes por bisa cu fraccion di MAS tambe tabata contra. Wyatt-Ras un biaha mas ta enfatisa cu e ta haya stranjo cu gobierno a duna parlamentarionan dienstverleningsovereenkomsten. Gobierno no kier a contesta cuanto. Netamente un gobierno cu ta pretende di ta integro no mag tin belangenverstrengeling. Si un parlamentario traha pa gobierno y despues bolbe drenta parlamento pa sostene e gobierno di mesun signatura, ki senjal esaki ta duna pueblo? Aki nepotismo ta manifesta su mes den gran forma.
