Parlamentario pa fraccion di AVP, Michael Lampe a mustra cu for di  algun luna caba, minister Otmar Oduber kende ta encarga cu parke nacional, a cuminsa traha e base pa impone su poder riba directiva di Fundacion Parke Arikok, cu eventualmente lo a poni un banda den maneho di e parke.

“Ya caba dia 20 di april 2018 el a prepara y entrega un mocion na parlamento pa aprobacion caminda ta bisa textualmente: ‘ta urgi gobierno pa evita cu e problemanan entre trahadonan y e actual directiva di parke nacional sigui aumenta y tuma pasonan necesario pa por logra un directiva cu por conta cu sosten di gobierno, sindicato, trahadonan, etc’ y cu esaki caba el a percura pa un polemica pa prepara e tipo di decisionnan aki cu e kier mira, cu no ta na bienestar di e parke.

Mi ta kere cu loke ta mas serio den henter e asunto aki ta e parti mas preocupante ta e mocion a conta cu firma di tur parlamentarionan cu ta sostene gobierno di coalicion, cu a sostene un mocion cu no ta benficia interes di e  parke y ta duna e minister e poder pa haci y deshaci y asina bay pone presion riba un directiva, cu si esaki no haci manera cu e minister kier, nan lo wordo manda cas.

Si tin un disputa cu directiva ta na su luga pa e minister sinta na mesa y atende cu e puntonan necesario pa asina yega na un acuerdo y si esaki no logra, tuma otro pasonan pero no pone bo mes den un posicion di poder y dicidi loke cu kier mira cu tin cu pasa.

Un mocion manera mi a bisa cu a wordo firma pa miembronan di e tres fraccionnan cu ta sosten gobierno sin cu sikiera e comision di parlamento encarga cu un asunto asina, a haya oportunidad di scucha opinion di directiva di e fundacion.

E ultimo desaroyonan ta crea un situaicon di crisis pa e parke ya cu e retonan cu e directiva saliente tabatin pa atende tanto pa e parke como pa e trahadonan, e forma di procede di e minister, no ta esun adecuado pa atende cu e situacion serio aki,” Parlamentario Michael Lampe a  declara.