Durante e Encuentro di Mike Eman cu Boluntarionan, evento di diaranson anochi den Renaissance Conference Center, e programa a inclui discurso di varios figura clave den mundo político y amigonan personal di lider di AVP. Su sobrinonan Anouk y Trevor como tambe su colega Dr. Mito Croes a hiba palabra e anochi radiante aki. Adicionalmente, a acerca un persona neutral for di comunidad pa duna su punto di bista imparcial na e publico cu a yena e sala. E persona ey tabata e conocido abogado Arlene Ellis-Schipper.

Ellis-Schipper a señala cu politica no ta su ambiente di custumber, pero si e ta un persona cu ta sigui di cerca e desaroyonan di su pais. El a acepta e invitacion di papia na e anochi solamente despues cu el a busca e Programa di Gobernacion cu AVP a presenta na 2009 y analisando su contenido, el a ripara cu “mayor parti di e puntonan a keda logra of ta den pleno proceso pa keda concretisa.”
Tambe e abogado a bisa cu e ta un votador consciente cu cada bes cu tin eleccion, e ta wak tur e opcionnan di manera masha obhetivo y aunke “na Aruba nos gusta critica y esey ta bon paso ta wanta e politiconan skerpi, tambe nos mester wak si e critica ta na su luga.” Na su opinion Mike Eman tin e capacidad pa traduci loke pueblo ta pidi di un vision. “Ademas e ta un bon manager paso e ta capaz di forma un bon team, guia e team y percura pa ehecucion di su vision,” Arlene a bisa añadiendo cu esey no ta facil den ningun ramo, pero ta e ingrediente principal pa ta exitoso.

Siguientemente el a repasa un pa un e puntonan principal di e programa di gobernaciona cu AVP a propone na 2009 comentando tras di cada un con el a bira un realidad of cu ta trahando riba dje caba. El a menciona, entre otro rehabilitacion di nos turismo, renobacion di nos centro di Oranjestad, trabou continuo riba infrastructura di nos pais, crea luga y oportunidad pa haci deporte y recreacion, renoba nos edificionan publico, drecha lazonan den Reino.

“Pa logra haci tur esaki y den e tempo stipula ta sin duda un gran logro,” e abogado a expresa. “Despues cu un politico presenta su vision y logra implement’e, consecuentemente e ta duna pueblo e confianza pa dun’e e mandato pa cuater aña mas.” Publico a tende cu ya caba Mike Eman y su ekipo ta trahando riba un futuro pa un economia renoba pa Aruba, pero pa esaki keda realisa den su totalidad, ta tuma otro team work pa aporta na dje y esey ta nos mes como Arubianonan. Arlene Ellis-Schipper ta sinti cu ta nos deber pa aporta mas den e proceso laboral y stimula nos productividad. “Hunto nos tur tin cu ta solidario pa sigui construi riba e base aki.”
Para dilanti di e masa berde y medionan di comunicacion presente, e abogado a demostra su respaldo na e vision y na e bon record cu Mike Eman tin. “Mi sa cu ta vision di nos Minister President pa sigui desaroya Aruba den un manera duradero cu siguiente generacionnan por sigui construi riba dje. Pesey mi ta haya importante pa duna Mike Eman e confianza pa sigui riba e caminda aki”.

El a specifica cu Mike Eman mester sigui traha riba e relacionnan den Reino y otro paisnan, sigui traha riba e desaroyo duradero den tur aspecto, sigui cu ‘smart choices’ paso… ainda falta. Cu esaki e abogado a referi na e puntonan cu ainda tin pendiente, como por ehempel mehoracion di educacion, scolnan cinco strea y eleva nos nivel di enseñanza. Tambe seguridad, paso seguridad y trankilidad ta aspectonan primordial pa sostenenos calidad di bida pa awe y mañan. Arlene Ellis-Schipper a finalisa su discurso bisando “Mi ta sigu cu hunto cu e team cu ta pueblo di Aruba y su persona, nos ta logra.”