Parlamentario di AVP Juan David Yrausquin diahuebs mainta a duna un splicacion breve di loke ta e programa di partido AVP ta encera. E splicacion aki a bini prome cu e ceremonia unda tur e 29 candidatonan riba e lista berde, a firma nan compromiso pa cu e programa di partido, unabes cu esaki haya aprobacion di Congreso di Partido.
E programa di partido, Yrausquin a cuminsa na splica, ta un documento masha importante pa AVP. “Nos ta biba den un pais democratico y como partido nos ta pone prioridad riba e parti democratico.” AVP tin mas cu 25 mil miembro registra, cu ta e voznan mas halto di e partido, ya cu “na final di dia ta nan ta dicidi rumbo y direccion di nos pais”. Pesey loke partido ta hiba Congreso ta un proposicion na e miembronan y pidiendo pa e wordo aproba. Durante e anochi aki, miembronan por trece resolucion y hasta por pidi pa haci cambio den e programa “pasobra nos ta un partido di pueblo y ta pueblo ta dicidi unda e pais ta bay”. E politico y candidato di AVP a menciona cu e prioridad number uno durante e ultimo eleccion tabata pa atende cu e crisis financiero economico cu a haya cu tabata uno hopi grandi. “Ta sumamente impresionante cu ora nos repasa e programa di ultimo eleccion y mira con mayoria di e puntonan a wordo cumpli cu nan.
Nos ta un partido cu loke nos bisa nos ta haci tambe. P’esey e programa ta asina importante.” El a recorda cu na 2009 – 2010 Aruba a confronta un crisis unda cu economia a cay cu 15%, mientras cu awo na 2013 tin crecemento economico y confiansa den e pais y perspectiva pa mehoracion. “Awor den e programa di 2013-2017 nos kier consolida e crecemento economico aki cu ta wordo proyecta, concretisa e diversificacion economico cu su base a wordo poni, percura pa stabilidad den impuestonan.” Un otro compromiso cu partido AVP lo bay asumi ta e reto pa balansa e presupuesto, percura pa confiansa den futuro di Aruba. E esencia di e programa ta pa converti e desaroyo economico cu ta bay wordo realisa den e proximo cuatro añanan y trece bienestar pa cada un di e ciudadanonan. “Esey ta nos compromiso cu nos ta bay pidi e confiansa di nos miembronan diasabra awor.”
