Un exito rotundo…..e apoyo ta masal.
Lider di partido AVP Mike Eman ta un persona super satisfecho despues cu e campaña di su partido a wordo lansa den forma abrumador. Su trabou duro y di su gobierno a paga bek. E sosten ta masal. Di tur skina hendenan a yega na Skina Berde pa duna nan apoyo. Nan apoyo na un gobierno cu a sa di goberna den forma drechi y transparante. Placa no a bay den saco di un solo famia. Aki e placa a wordo inverti den pueblo cu tur sorto di beneficio. Esey ta bisto y ta wordo aprecia grandemente.
Lider di partido AVP Mike Eman tabatin palabranan di elogio pa cada un di su Ministernan y tambe pa cada un di e miembronan di Parlamento di fraccion di AVP pa e bon trabou haci durante e periodo tras di lomba. Benny Sevinger a bisa cu sin un lider fuerte y un bon guia e trabou aki no por a tuma lugar. Mientras e tabata grita ‘Mike Eman, Bon Trabou, nos Lider Bon Trabou”, e publico a bira completamente exita. E aplauso pa e lider incansabel y dedica aki a dura algun minuut largo.
Mike Eman, lider di AVP “Di pariba pa pabou, di pasuit pa panort, nos curazon ta cu henter e pueblo aki. Lo mi sigui cana te ora mi no tin rosea mas. Lo mi sigui lucha te ora mi curazon no permiti mas. Lo mi sigui duna y entrega na e pueblo aki cu tur mi energia. Mi ta sigur cu hunto cu mi e ekipo di Partido di Pueblo Arubano AVP ta mes dedica cu mi. Un ekipo cu a wordo amplia cu candidatonan nobo. Durante e simannan cu ta bin bos ta bay siña conoce mas di nan”.
Esnan cu no tey cu mas tambe a wordo recorda pa lider di AVP Mike Eman durante e anochi special aki. Como simbolo di tur cu a bay y a laga un bashi atras, di tur cu ta sinti nan falta, a rindi tributo na un hoben cu tabata traha den oficina di Prome Minister Eman y a muri un morto repentino. “Carlos Pimienta a lucha hunto cu nos y awe e no tey mas, pero su dedicacion na partido semper lo wordo aprecia”. E mama di Carlos Pimienta sra. Carmen a haya e prome bandera nobo di partido AVP pa pone den camber di Carlos. Un gesto cu a wordo aprecia cu masha hopi emocion di esnan presente.
Lider di AVP tabatin hopi palabra di aprecio pa e inventividad di e hobennan cu a construi Skina Berde. Cu container y algun palet a crea un lugar bunita y innovativo. Mentenan hoben y creativo a haci e trabou artistico aki. E celebracion a sigui te laat den e ambiente positivo cu tabata reina desde un comienso. Pa su dia siguiente e lugar a wordo haci limpid or di miembronan di partido AVP. E cambio ta continua!!!
