Anne Frank tabata un mucha muhe fuerte, inteligente y cu hopi curashi cu a nace na Alemania di un famia hidiu y cu su cuater aña a muda pa Hulanda. Durante e segunda guera mundial Anne Frank y su famia a wordo persigui pa motibo di religion. Anne Frank, hunto cu su famia a sconde pa dos anja largo den locual nos ta yama “het achterhuis”. Dos aña largo unda Anne no por a bay pafo, dos aña largo sera paden, unda su unico consuelo tabata su dagboek “Kitty”. Den su dagboek e tabata skirbi tur su angustianan di biba scondi pero tambe na mes momento e tabata comparti su speranza cu e lo tin un miho futuro. Anne su gran soño tabata pa un dia, e por logra publica un buki. Lastimamente despues di dos aña den e escondite, Anne hunto cu full su famia a wordo atrapa. Anne, su rumannan y su mama no a logra sobrebi e holocaust. Anne su soño di un dia publica un buki a ser realisa door di su tata, Otto, cu si a logra sobrebi e holocaust y cu a bin encontra cu e dagboek di Anne, despues di e guera. Esta “The diary of a young girl”. Esaki a bira un buki sumamente conoci mundialmente, den cual cu nos tin e privilegio di lesa tur e pensamento nan di e hobencita balente durante su momentonan mas dificil. Unda nos por mira cu apesar di tur circunstancia, Anne nunca a perde speranza den humanidad. Sigur algo remarkabel cu nos tur por tuma como ehempel. Anne Frank, hunto cu miyones di otronan tabata victimanan inocente di persecucion, violencia y intelorancia.

Tolerancia, respet y amor pa nos prohimo ta balornan di sumo importancia. Nos como comunidad semper mester keda alerta y cauteloso ora cu nos mira intimidacion y persucion. E amor pa nos prohimo mester sigura cu nos no ta laga espacio pa discriminacion den ningun forma. Pa nos siña lanta para pa otro y pa percura cu e derecho humano nan di tur hende wordo respeta semper.

 Pa asina nos por biba den paz, prosperidad y harmonia.

Un di e lesnan mas grandi cu nos por siña di e holocaust ta cu na momento cu nos mira peliger pa humanidad nos nunca mester keda keto.

Manera Anne Frank mes a bisa, “How wonderful it is that nobody needs to wait a single moment before starting to improve the world”, den papiamento “Con maravilloso e ta cu niun hende no mester warda pa ningun momento prome cu cuminsa mehora mundo.”

Nos por tuma esaki como ehempel y iniciativa pa trece cambio.

E statua aki ta un recuerdo importante di e tremendo balentia di un mucha muhe hopi hoben pero hopi madura y cu hopi curashi. Pa es motibo ta importante pa nos ta para aki nan awe y pa nos nunca lubida di su inmenso sacrificionan.

E ta responsibilidad di cada un di nos  pa recorda tanto e parti bon como e parti malonan di nos historia, pa asina nos por sigui pa dilanti y coregi e cosnan cu a bay robes den pasado. Ta un hecho cu nos no por cambia loke ja a sosode, pero si ta den nos man pa percura pa e no ripiti nunca mas.

Pa nos como hobennan, Anne a mustra nos cu ya for di hoben ta importante pa nos tin un opinion riba locual ta pasa den nos comunidad y pa ta dispuesto pa cu curashi discribi locual no ta bon y pa tin e voluntad y e ideal pa haci mundo un miho lugar pa biba pa tur prohimo.

Awe nos ta para akinan cu un curazon y alma yen di voluntad pa cumpli cu e compromiso y responsabilidad aki.