Haring ta un pisca shinishi, hopi gusta na Hulanda. Ora ta smoke un haring e ta bira colo cora y naturalmente ta haya un holo mas fuerte. Segun un storia bieu, cachonan di casa tabata tras di un coneu y pa scapa bida di e coneu un “red herring” a ser uza pa despista e cachonan. E holo fuerte lo a confundi e cachonan pa e coneu logra scapa. Pa e motibo aki e termino “red herring” ta expresa un argumento falso (sofismo) cu tin como meta despista hende for di un argumento incomodo. 

Minister di Salubridad Publico, Dangui Oduber, recientemente a demonstra uzo di un “red herring” ora cu e no kier enfrenta su responsabilidad pa e corupcion den escala grandi cu a tuma luga na DVG. Ora cu parlamentario Mervin Wyatt-Ras (AVP) ta mustra riba su responsabilidad,^[1] e minister ta draai e cuenta: “Hopi lamentabel, tristo y condenabel con Mervin ta atacha credibilidad di henter un departamento asina importante y lastra tur e empleadonan.”^[2] Esaki ta un “red herring”. E minister simplemente no kier contesta e pregunta encuanto su responsabilidad.

E realidad ta cu ningun “red herring” por tapa e holo stinki di pisca putri di e maneho di integridad di Gabinete Wever-Croes: Censo, DIMP, OM y DVG ta nos departamentonan mas prominente. Toch hasta eyden fraude y corupcion ta tumando luga. Ta e maneho di Gabinete Wever-Croes mes ta facilita e corupcion aki. Minister Oduber a perde un caso den corte pa motibo di metemento politico den Fundacion Lotto pa Deporte y no ta nada straño cu ta e bufete di tata di señora Evelyn a defende Gobierno den e caso aki.^[3] Den un cultura di nepotismo, clientilismo politico y di faboritismo, ta normal cu politiconan ta percura pa “nan hendenan” tin acceso na cierto actividad comercial y cierto cupo di trabao. Esunnan cu no ta parti di e amigonan aki ta core peliger di ser kita for di trabao pa motibonan politico. Djis corda e caso di director di DVG, Jerry Staring.^[4]

Tur hende sa cu e falta di mecanismonan di control ta crea e oportunidad pa violacion di principionan di integridad. Si e empleadonan ademas ta hopi ambicioso, tin problema financiero of tin un adiccion, nan lo tin e motivacion pa comete fraude. E triangulo di fraude (fraud triangle) ta completo na momento cu e ministernan mes ta crea hustificacion pa fraude pa medio di nan nepotismo y otro tendencianan cu ta corumpi henter e aparato gubernamental: “a fish rots from the head down”. Gabinete Wever-Croes tin un preferencia pa haci uzo di “red herrings” pa tapa holo di pisca putri. Si nos kier un politica nobo, ta necesario pa MEP la su preferencia pa e colo cora un banda y dedica un poco mas na e contenido di nan comunicadonan.

^[1] Trempan, diaranson 5 di januari 2022, 18.

^[2] Trempan, diaranson 5 di januari 2022, p. 13.

^[3] SENTENCIALOTTO.pdf (noticiacla.com)

^[4] Hues a dicta: Drs. Jerry Staring a recobra tur autoridad como Director – 24ora.com.