Diabierna e atencion politico ta dirigi riba e ambiente cu lo tin na e skina di Adriaan Lacle y L.G. Smith Boulevard. Esaki ta e apertura di e campanja di AVP. Nan a escoge Green Square como e nomber pa nan lugar caminda for di awor te cu September di eleccion lo tin hopi actividad dirigi pa nos hobennan. Lo tin hopi informacion dirigi riba energia sostenible.

Diabierna awor mes for di 5or lo tin accion di sticker y durante anochi ambiente total cu musica. Varios di e candidatonan di AVP lo yega den un caravana saliendo for di diferente barrio of distrito. E concepto di Green Square lo acapara atencion di hopi hende si mira con e ta wordo hinca den otro. Mike Eman lider di partido AVP diahuebs anochi a bai na e Green Square y a bai te na un di e partinan mas ariba pa mira con e bista ta. AVP ta warda e pueblo diabierna for di oranan trempan di anochi pa ranca sali cu nan den e ambiente total cu lanzamento di nan campanja pa eleccion 2013.