Fraccion di AVP a alerta Gobierno riba e implicacionan di e pakete di medida cu nan a introduci sin consulta, sin un estudio adecuado y sin hiba dialogo cu instancianan concerni y e concecuencia grandi cu e cambionan aki  lo bay tin pa famianan.

Paerlamentario di fraccion di AVP, sr Michael Lampe a mustra cu sinembargo Gobierno no a duna oido na e preocupacionan aki y a introduci e medidanan  dia prome di juli ultimo y den e prome tres siman cu esaki ta na vigor, henter pueblo riba tur nivel ta sinti e impacto di e medidanan aki y cu ta pinta cu nan efecto lo sigui bay crea mas problema serio pa pueblo.

“Eliminacion di exoneracion di BBO y BAZV pa servicionan financiero y bancario, como tambe pa seguronan comercial, tin implicacionan serio pa e clima di inversion y ta un impuesto adicional pa pueblo cu mester haci uzo di e servicionan aki.

Fuera di esaki e servicionan aki parti grandi di e entradanan di e institucionan financiero y nan lo conoce un aumento di 0% pa 6% for di 1 di juli.

Ora cu nos analisa e operating income di djies e banconan comercial, ta papiando aki di un entrada adicional di casi 10 miyon di florin pa caha di Gobierno  y fuera di esaki no a tene cuenta ainda cu e otro institucionan financiero y di credito.

Tur esaki despues cu coalicion a aproba un ley ciegamente sin ningun conseho, sin ningun consulta y sin ningun proyeccion macro economico pa su efectonan.

Fuera di e instituto- y instanciana menciona caba,  eliminacion di exoneracion aki ta conta tambe pa companian di seguro, institucionan cu ta eherce actividadnan financiero y di credito manera APFA, Volkskredietbank y FCCA, ya cu nan tambe lo añadi BBO y BAZV riba e servicionan cu nan ta presta na e cliente y ta obvio cu e instancianan aki lo pasa e peso pa e cliente.

Esaki lo bira un impuesto adicional pa e cliente y den proximo dianan cu e momento cu mester paga nan cuenta mensual, esaki lo bolbe resalta den e extra gasto cu nan tin cu paga awor.

For di prome di juli a cuminsa cobra BBO y BAZV riba transfer fees, credit card fees, deposit fees, closing fees, ora di lanta placa na e ATM di un otro banco y tambe ora di cera siguro di auto y di biahe y ya hopi hende a sinti esaki den carne propio.

‘Cost of doing business’ ta aumentando enormemente na Aruba y lo prehudica e competitividad di e comerciante chikito, pero tambe lo aumenta e peso riba e cliente cu ta haci uzo di servicionan y lo tin consecuencianan enorme pa e inversionista, e comerciante, e empresario chikito, pa young profesionals y pa esunnan cu ta traha independientemente y  tambe e startup.

E transicion pa mas impuesto indirecto sin cu tin compensacion debido pa esunnan mas vulnerabel por tin repercusion hopi pisa pa esunnan di menos recurso.

Gabinete Wever Croes a introduci un pakete di medida cu no solamente ta mishi den cartera di famianan, hasta habracando esaki for di otro,  pasobra e compensacion cu Gobierno a priminti no ta completo y tin como consecuencia cu 10.0000 pensionado ta bay perde nan reparatietoeslag na comienso di 2019,” Parlamentario Michael Lampe a declara.