Prome medida di gobierno Oduber-Wever-Croes a drenta na vigor y esaki a wordo implementa den un forma y estilo contrario na loke Prome Minsiter a anuncia na momento di a presenta su gabinete na luna di november ultimo, lider di fraccion di AVP, sr Marlon Sneek ta mustra.
E parlamentario a mustra cu e mesun gobierno aki cu a insisti na instalacion di e gabinete cu pueblo lo haya un gobierno cu lo aplica transparencia y cu lo pone e hende central na tur momento, ta bira comete su prome barbaridad ya cu mester cubri su fayo di incapacidad den e unico forma cu e gobierno aki por, esta cu medida contra pueblo.
“MEP no por goberna sin medida, caminda nos a tuma nota e siman aki ora cu Minister di Finansa a anuncia cu gran fanfaria, cu prijs di gasolin ta bay baha a base di desaroyo riba mercado mundial.
Den un comunicado emiti Gobierno ta anuncia cu prijs riba gasolin lo baha cu 1.1 cen pa liter, prijs di diesel USL lo baha cu 3.3 cen y prijs di kerosin ta baha cu 3.1 cual gobierno ta kere cu masha bon noticia.
Sinembargo den mesun comunicado aki den letter chikito por lesa cu e reduccion aki ta wordo acompaña c’un aumento cu gobierno ta yama adaptacion di 2 cen pa cada liter cual adaptacion ta data for di luna di mei di 2007 pero cu nunca a wordo implementa.
Cu otro palabra mientras cu e minister ta bisa cu lo reduci prijs di gasolin, diesel y kerosin, na mes momento gobierno ta implementa 2 cen riba cada liter di e combustibelnan menciona cu ta bay den caha di gobierno.
Pues e reduccion ta nifica cu pueblo lo no mira algo di esaki, ya cu gobierno a impone 2 cen riba tur e tres combustibelnan aki anulando asina por completo e reduccion anuncia pa pueblo.
Ta di lamenta c’un gobierno cu ta papia di transparencia, cu ta papia di integridad, ta mustra cu e zapato di integridad ta keda nan mucho grandi te cu nan ta cana trompica riba esaki ya cu nificacion di e palabra aki, ta demasiado grandi pa gobierno aki honra pueblo cune.
E realidad di e asunto aki ta cu gobierno ta baha e prijs di combustibel cu 3 cen pa liter pero na mes momento ta bira subi 2 cen extra riba cada liter di combustibel cu wordo cumpra cual placa ta bay den saco di e gobierno aki, confirmando un biaha mas cu ta pueblo lo sufri e consecuencia di un gobierno di MEP cu no sa kico pa haci den gobernacion di e pais.
Loke ta mas notabel di henter e desaroyo aki ta e hecho cu e mesun minister di economia aki, kende riba su facebook y den medionan di comunicacion a splica na placa chikito di con combustibel a aumenta algun siman atras, awor no ta haci mesun cos bisando pueblo di e aumento di 2 cen cu el a dicidi di impone riba pueblo.
Nos tin cu corda tambe cu MEP no por goberna sin refineria, caminda cu na 1986 cu gabinete Henny Eman a sinta pa prome biaha, no tabatin refineria pero a bin c’un plan di rescate y a salba e pueblo aki.
Si mira e ocho aña di gabinete Mike Eman, tambe sin refineria pero MEP semper a goberna cu refineria, c’un GDP hopi mas halto, cu hopi placa den caha, y asina mes a suta pueblo cu medida.
Corda awo cu Aruba no tin un refineria y pueblo tin cu ta prepara pa tur loke ta bay bin na caminda y nos kier haci tur hende consciente di loke ta biniendo na caminda,” lider di fraccion di AVP, Marlon Sneek ta mustra.
