Desde cu lider di MEP, Evelyne Wever Coes   a huramenta como Prome Minister di Aruba, na nomber di su gobierno ainda e no por duna pueblo di Aruba un noticia positivo  cu su gobierno lo ta trahando riba dje pa pueblo.

Esaki Parlamentario Marlon Sneek di fraccion di AVP ta mustra despues cu Premier Wever Croes a informa cu posiblemente lo tin un KB na caminda pa su gobierno,  pa motibo cu su gabinete no por cumpli cu normanan stipula.

“Un noticia cu gobierno a anuncia e siman aki den medionan di comunicacion, ta bisa cu lo tin un KB na caminda pa pueblo y aki tin cu señala pueblo, pasobra esaki kiermen cu pueblo lo perde su autonomia.

Esey ta loke gabinete Oduber Wever Croes aki ta bay causa pa nos pueblo, esta cu nos ta bay perde nos autonomia simplemente pa motibo cu nos tin un gabinete cu ta incompetente.

Nos tin hendenan cu no sa con pa haci nan trabou y awe nos ta mira cu ya nan a core sali pa bisa cu loke ta na caminda, no ta di nan gobierno pero di e gobierno anterior.

Aki nos tin cu mustra cu nos tin un ly di CAFT y manera tur hende sa cu ta na altura di e ley aki, sa bon cla cu e ley aki lo termina na 2018 despues cu presupuesto 2018 a yega  na un balanced budget, pero awe nos ta mira cu direccion cu e gobierno aki a bay, no ta bay cumpli cu e balanced budget aki.

Pa tal motibo nos tin preguntanan cu nos a haci pasobra si nos mira e ley di CAFT, e ley ta papia bon cla den articulo 2, inciso 1A cu ta bisa: “er is een college Aruba Financieel Toezicht dat onverminderd het elders in deze landsverordening vermeldt als taak heeft,” pues ta bisa kico ta e tareanan di  e comision aki.

Aki nos por señala lo siguiente punto A: “het toezien op het toepassing door het land van de  normen in artikel 14,”  pues tin normanan cu hancra den articulo 14.

Si tuma articulo 14 nos ta mira cu e norma di mas importante cu nos por tuma den esaki cu ta capitulo  4  ta bisa cu mester cumpli cu e norma di deficit y esaki ta bisa lo siguiente:

“de normen voor  de beoordeling van de begroting en voorgenomen geldleningen:  voor het land bedraagt het tekort voor de begrotingsjaar 2015   maximaal 3.7% van het BBP,  in 2016 maximaal 2%, in 2017 maximaal 0.5%  met in 2018 een overschot van minimaal 0.5%.”

Pues si  gobierno no cumpli cu e normanan aki, lo bo mester tin cambia e ley aki na Parlamento ya cu esey ta e cuadro legal pa cual CFT a wordo lanta den cual CFT ta funciona y traha of solamente si Hulanda, esun cu ta cana na Europa cu tur regla den man, ta bay kibra regla.

E ley ta bisa bon cla cu ta basa riba e cifranan menciona, lo bay haci e ‘toetsting’ di e presupuesto y tur cos ta indica cu gobierno no ta bay cumpli cu e cifranan aki.

Kiermen nos tin cu bay waki si gobierno di transparencia aki lo bay bin Parlamento pa cambia e ley aki pa por cumpli cune, ya di otro banda CAFT no tin un cuadro legal pa funciona den esaki y nos ta bay wak ki dia e ley aki ta yega y consecuentemente ki dia e presupuesto mes ta bay yega Parlamento.

Manera nos a anuncia, tin un cantidad di medida na caminda y sigur un di nan cu a capta nos atencion, ta cu BBO lo bay subi te na 6%, pues esaki pa nos ta importante pa Minister bin Parlamento y duna claridad pero nos ta mira e minister tur caminda, e ta riba avion pa bay Hulanda pa bay celebra Arubadag pero Parlamento, e organo caminda e mester bin duna cuenta, e no ta yega

Esaki ta di lamenta ya cu tempo cu e tabata den oposicion cu boca  grandi e tabata bisa cuno tabatin transparencia y cu gobierno no tabata contesta su preguntanan pero awor nos fraccion tin mas di 40 pregunta dirigi na su persona y ainda e no a contesta un di nan,” Parlamentario Marlon Sneek a declara.