Na momento cu Prome Minister a regresa for di Hulanda el a bay prensa y gaba con bon el a wordo ricibi pa gobierno Hulandes, insistiendo cu nan ta contento cu esfuerso y trabou di su gabinete, e impresion ta wordo crea cu e mandatario no ta sincero cu su pueblo.
Esaki Parlamentario Marlon Sneek ta trece dilanti mustrando cu despues di a sinta elogia e maneho di su gobierno, un siman despues e mesun Prome Minister Wever Croes ta confirma cu Hulanda tin un KB cla pa ehecuta contra e maneho di su gobierno.
“Pueblo ya a custumbra caba cu e mentalidad y forma di procede di Minister Presidente Wever Croes, ya cu si e tabata tin e curashi di gaña su pueblo durante di campaña cu e lo atende cu e situacion financiero sin tuma ningun medida, awor tin un avalancha di medida pa drenta na vigor dentro di algun dia.
Fundadador y lider di partido MEP den felis memoria, Betico Croes, semper a mustra riba e dicho sagrado pa su persona, esta cu “Vox Populi, Vox Dei,” esta cu bos di pueblo ta bos di Dios pero pa e lider actual di e pais y di MEP, bos di pueblo no ta conta.
Despues di a logra su votonan durante di e eleccion ultimo, Evelyne Wever Croes no a cumpli cu su promesanan , di entre otro baha e cantidad di minister na 7 y reduci gasto di biahamento cu cual e kier spaar 50 miyon florin.
El a priminti di baha prijs di gasolin pero loke el a hasi ta impone un cobransa di 2 cen di accijns riba gasolin y su promesa di importa gasolin mas barata, no por ser mira ningun caminda.
El a priminti di atende cu e situacion financiero sin cu su gobierno lo tuma medida y su hendenan den parlamento cu tanto a priminti un era nobo di controla gobierno, a bay di acuerdo pa su gobierno hinca man den cartera di pueblo pa asina ey e haya 130 miyon pa gasta.
El a priminti pensionadonan cu lo elimina e pago di prima di AZV cu lo duna e grupo aki algo extra na entrada y hasta a saca avisonan grandi den corant mescos cu su colega Oduber felicitando e pensionadonan, pa despues su Minister di Finansa bin desbarata esaki durante di reunion publico, confirmando cu ta SVB ta paga e prima aki y cu e reduccion di pago di prima ta bay pa SVB y no e pensionado.
A priminti di lo soluciona e ola di criminalidad pero pueblo por sinti cu ainda nan no a mira algo wordo haci den e direccion aki y asina por sigui menciona cantidad di otro promesanan cu e lider di MEP y su hendenan a priminti, cu no ta wordo cumpli.
Ora cu nos analisa declaracionnan cu Prome Minister ta haci den conferencia di prensa, ta mustra cu e ta sigui mal bruha y cu su gobierno no sa kico pa haci y awor hasta ta papia cu e lo acepta un KB si ta necesario.
E hecho cu e prome mandatario ta papia di bin cu areglo di VUT y atende cu overtolligpool, ta cosnan cu a wordo purba caba y no a wordo soluciona ya cu e interes di trahadonan pa bay cu VUT no tabata existi.
Loke nos por interpreta di tur loke Premier Wever Croes ta bisando den ultimo dianan ta cu el a yega na un acuerdo of palabracion cu Hulanda caminda su gobierno lo bay ofrece paketenan di retiro na trahadonan publico y cu Hulanda lo tuma parti di gasto aki over pa su cuenta pero contal cu gabinete Wever Croes cuminsa manda hende cas.
Un desaroyo increibel ya cu ultimo añanan semper gabinete Mike Eman a logra cumpli cu palabracionnan haci, cu normanan fiha entre gobierno di Aruba y di Hulanda, pa yega na reduci e dificit y yega na un presupuesto balansa loke gabinete Wever Croes simplemente no ta capas di haci y no tin nocion con pa cumpli cu normanan aki, pero si ta specialisa na yena e aparato di gobierno cu sostenedo- y amigonan,” ParlamentarioMarlon Sneek a mustra.
