Transparencia y integridad ta a base di e acuerdo di gobernacion di e actual gobierno do coalicion di MEP-POR-RED pero despues di nuebe luna den gobernacion, e balor y nificacion di e palabranan aki a devalua por completo, Parlamentario Benny Sevinger a declara.
“Nos por a scucha Prome Minister papia di su biahe pa Hulanda, di reunionnan cu el a sostene cu mandatarionan Hulandes y cu entre otro henter Hulanda ta contento cu su gobierno pero un biaha mas e lider di MEP ta haci net lo contrario di loke e mes a propaganda pa añanan largo, esta cu e NO ta bisa loke e ta haci y NO ta haci loke e ta bisa.
Den su encuentro cu Secretario di Estado Knops su persona a wordo atendi riba e hecho di aumento di gasto di persona, cu su gobierno a tuma mas cu 300 hende den servicio den apenas algun luna na mando y no tabatin argumento valido pa convence e mandatario Hulandes.
Sconde e no por a sconde e hecho cu su gobierno a bin ta empleando un cantidad di hende den servicion, pa colmo tur sostenedonan di un di e partidonan, caminda entre otro durante tratamento di presupuesto, minister Otmar Oduber a bisa cu na DIP, ex minister Sevinger a laga 40 posicion habri paso mi persona no a nombra hende den e departamento aki.
Claro cu nos gobierno no a nombra hende y yena e puestonan aki pasobra esey tabata nos maneho, esta di baha e cantidad di hendenan cu ta traha den e aparato di gobierno, pues hendenan cu tabata bay cu pensioen nos gobierno no a nombra hende nobo na nan luga.
Minister Oduber a bisa cu e ta bay yena e 20 puestonan aki, kiermen cu riba e 100 menciona den e rapport di CAFT, a nombra 20 mas cu a drenta na DIP y asina nan lo sigui yena e aparato y nos kier sa con esaki ta bay contribui na loke Prome Minister Evelyne Wever Croes a anuncia e priminti esaki na Hulanda cu e lo bay corta den gasto di personal.
Awor Premier a manda un plan cual plan ningun hende sa su contenido sinembargo e plan ta contene e decision di gabinete Wever Croes cu trahadonan lo bay perde trabou.
Na momento cu e prome minister ta bisa cu lo bay ofrece un pakete di retiro na trahadonan, tin cu haci e pregunta na unda e hendenan aki lo bay, na hotel, tin cupo pa nan, den refineria, cual refineria cu e prome mandatario no kier a habri, of nan ta bay den onderstand ora cu e placa di e pakete caba.
Esey ta e preguntanan cu e gobierno tin cu haci na momento cu e tin un plan di retira hende for di servicio y tur esaki ta sosode sin dialogo, sin discusion riba nada di esaki pero tanto Parlamento como sindicatonan ta haya e informacion aki na momento cu duna informacion na prensa.
Esaki Minister Presidente a priminti Hulanda, despues cu Hulanda a hala su atencion cu e ta papia di reduci gasto di personal dor di manda hende cas pero di otro banda ta tuma un otro grupo di trahado.
Minister Otmar Oduber a bisa den Parlamento cu Minister Presidente sinta banda di dje, cu tin un buraco di 20 hende na DIP y cu su persona lo bay yega e buraconan aki y den cierto forma a bisa e lider di MEP cu su persona tin cu bay mira con e ta retira hende den su ministerio pa cubri esaki bek,” Parlamentario Benny Sevinger a trece dilanti.
