For di momento cu gobierno actual tabata preprando presupuesto p’e aña 2018 tabata conoci cu mucho lo no bai dura cu medidanan drastico lo bai wordo tuma contra di pueblo.
Nos tur a spera cu Gabinete Wever-Croes lo a cumpli cu su promesanan di campaña y demostra di ta un ehempel pa nos ciudadanonan door di hala faha mara.
En bes di hala faha mara a opta pa aumenta gastonan di e aparato gubernamental cu nan no por a financia. Consecuencia di esaki a introduci diferente medida severo pa asina por logra paga e gastonan extra cu Gabinete Wever-Croes a hasi.
A dicidi pa aumenta BBO, aumenta BAZV y introduci un belasting nobo. Remarcabel ta e hecho cu a yega na tal decision sin tin ningun tipo di consulta cu ningun gremio y ningun sindicatio.
E mesun “move” aki gobierno a haci na aña 2007 creando caos y panico den comunidad pasobra prijsnan di comestibles y di otro necesidadnan basico a aumenta por lo menos 3 biaha e balor di e impuesto introduci. Consecuencia fatal a bira perdida di poder di compra.
Awe na aña 2018 e mesun impuesto ey ta wordo aumenta na 6% ignorando e efectonan secundario riba e poder di compra. Pueblo por a nota caba cu prijs di pan ta e prome cu a subi y esaki ta solamente e comienso. Pero poder di compra no solamente ta bai wordo afecta dor cu a introduci e impuesto sino tambe pe hecho cu a dicidi elimina cierto exoneracionan riba servicionan cu antes bo no tawata paga impuesto riba nan por ehempel servicionan bancario y di siguronan.
Esaki kiermen cu tur comision riba servicio y primanan di seguro lo aumenta den forma directo. Cada florin di e ciudadano ta di hopi balor pa su presupuesto familiar y awor ta bay resulta cu famia completo lo bai carga peso di medidanan severo cu ta wordo introduci dor di un gobierno cu no a ‘lead by example.’
Poder di compra y e presupuesto familiar ta wordo afecta tambe dor di e subida di prijs di gasolin. Aunke gobierno y su fraccionan den parlamento a trata na manipula pueblo cu e subida ta un consecuencia di prijs di crudo internacional, nan no por nenga cu Gabinete Wever-Croes y nan a aproba un suma adicional na accijns di 10 miyon florin. Tur famia ta haci uzo di nan auto pa cumpli cu transporte basico sea di bay trabou of hiba famia scol y awor ta pagando extra riba esakinan dor cu Gabinete Wever-Croes a ‘take the easy way out’ di castiga pueblo.
Pa corona e obra dos dia prome cu e entrada di medidanan di 1 juli e gobierno actual y minister di infrastructura a dicidi di obliga pueblo pa paga pa recohemento di sushi.
Na un instancia nos lo a pensa cu un tarifa social lo tawata mas apropia mirando e hecho cu e peso di medidanan ta uno bastante pisa, pero a resulta cu e minister concerni y su colega minister di finansas lo a yega na un areglo pa bai stipula e prijs segun entrada di e cas. Segun nos por a compronde cu tin diferente categoria di prijs y lo por yega te 90 florin pa luna.
Como representante di pueblo mi ta condena e hecho cu a recori pa castiga pueblo cu un pakete di medida asina severo.
Responsabilidad di e gobierno mester tawata reduci gasto, cual no ta e caso. En conexion cu esaki nos fraccion lo bai yama un reunion publico pa debati e proposicion aki.
