E falta grandi di informacion y transparencia a bolbe sali na cla durante di e dos reunionnan informativo cu partido AVP a organisa te cu awor riba e pakete di medida cu gobierno a introduci y cu lo drenta na vigor diadomingo venidero dia prome di juli. Esaki ta loke miembro di fraccion di AVP, Sr. Richard Arends a trece dilanti diamars ultimo durante di e reunion informativo na MFA na Noord, caminda a duna un splicacion amplio di e impacto di e decision di gobierno, pa castiga pueblo cu su pakete di medida. Remarcabel ta cu hopi di e ciudadanonan cu a duna acta di presencia na e reunion aki, a bin haya porfin un bista di loke ta spera henter pueblo asina cu luna di juli drenta na vigor y caminda bida di tur ciudadano, lo wordo impacta formalmente pa e forma con gobierno a dicidi di aumenta BBO y BAZV.
“Ta hopi importante pa splica e efectonan di e aumento di BBO y BAZV, como tambe e ampliacion di e base y esaki ta hopi importante pasobra hopi cos cu antes no tabata paga BBP y BAZV riba nan, lo conoce un aumento di 0% pa 6% riba esakinan. Cierto servicionan manera esun bancario, cu antes tabata wordo exonera, awor ta bay cobra di 0 pa 6% di biaha, pues e costo di haci negoshi bay aumenta. 99% di productonan cu ta wordo consumi na Aruba ta wordo importa. Na momento cu un importado mester trece su producto for di exterior, ta bay costa e importado mas placa pa cumpra nan, ya cu e tin cu bay cumpra dollars y banconan ta bay cobra pa e servicionan aki. Hopi comerciante, empresanan mediano y chikito pa tur e añanan aki por a absorba e BBO y BAZV pa mantene nan competividad, lo no por absorba esaki mas for di awor en adelante. Esaki ta bira un peso adicional riba e gastonan di haci negoshi aki na Aruba y lo wordo traduci den un aumento di prijs y un aumento di costo di bida pa e consumidor.
Presupuesto 2018 ta consisti di un aumento di 133 miyon na entrada. 28 miyon di e suma aki ta regarda e aumento di BAZV y 42 miyon ta e aumento di BBO. Ademas lo saca 43 miyon di empresanan estatal limitando nan espacio pa inverti y reduci gastonan di operacion pa asina por baha e tarifanan di awa y coriente manera cu gobierno a priminti durante campaña electoral.
Entradanan di vergunning y leges lo aumenta cu 5 miyon. No mester lubida cu gobierno a presupuesta pa aumenta accijns cu na aña 2018 pa logra un entrada adicional di 10 miyon na vispera di tratamento di e ley. E ley a wordo pasa ciegamente nan a pasa e, irespecto di su efectonan pa e cartera di e ciudadano, pa empresanan chikito y pa economia di Aruba en general.
Mescos cu na aña 2007 ora cu introduci BBO di 3%, esaki a resulta den un inflacion riba 10%.
Durante reunion den Parlamento, gobierno a bisa cu e aumento aki di BBO y BAZV di 2.5%, lo percura pa djis un inflacion di 3.4% so e ta trece cu’ne. 10 aña pasa a wordo bisa mescos y finalmente nos a conoce un inflacion nunca antes experiencia den historia di Aruba. Awe nos ta experenciando e mesun factornan na momento cu a introduci BBO: no tabata tin crecemento economico, prijs di energia ta aumenta y Gobierno ta hisa e peso di belasting pa ciudadano y empresanan.
