Momento a yega pa Prome Minister Evelyne Wever Croes informa pueblo y Parlamento, tur loke el a palabra for di dos siman pasa cu gobierno Hulandes y con e ta bay haci loke el a bisa nan e ta bay haci, lider di fraccion di AVP, Marlon Sneek ta cuestiona.
E presupuesto 2018 cu Gabinete Wever Croes a traha no ta cumpli cu normanan stipula y a bin haya observacion di tanto CAFT como gobierno Hulandes, cu na luga di baha gasto di personal, a aumenta esaki formalmente, creando un situacion bergonsoso pa gobierno.
“For di momento cu Prome Minister Wever Croes a regresa Aruba, el a duna declaracionnan den cual e ta papia mita berdad y no a informa Parlamento tampoco di palabracionnan haci mientras cu na mes momento tanto CAFT como gobierno di Reino a ordena gobierno pa reduci gasto di personal den presupuesto 2018, prome cu esaki wordo aproba pa CAFT.
AVP caba for di siman pasa a mustra riba e hecho cu tur cos ta indica cu Prome Minister a sigura Hulanda cu lo bay over na manda 300 persona di gobierno cas pa asina yega na palabracionnan nobo cu el a haci.
Aki na Aruba Evelyne Wever Croes mester a convence su conseho di minister cu mester cumpli cu palabracionnan haci cu Hulanda y no a keda nada otro pa acepta cu mester reduci gasto di personal cu 12 miyon florin cu ta eqivalente na 300 persona.
Ta a base di e siguransa cu lo cumpli cu e exigencia aki, e presupuesto ta conta cu sosten di CAFT pero caminda ta bon cla poni cu gobierno tin cu presenta un presupuesto supletorio den cual por mira claramente cu a reduci e gasto di personal cu 12 miyon florin pues cu lo a manda 300 hende cas.
Mientras cu tanto Minister Presidente como Minister di Finansa tabata sumamente felis cu aprobacion di CAFT cu su presupuesto 2018, prome minister Wever Croes ainda no tin e curashi di informa pueblo con esaki lo tuma luga, esta cuanto hende lo tin cu bay cas y nos ta calcula aki lo ta algo mas cu 300 trahado publico y tampoco a informa den ki sector esaki lo tuma luga.
Esaki atrobe ta mustra bon cla cu loke AVP y CAFT for di un principio a mustra riba aumento di gasto di personal desde cu gabinete Wever Croes a tuma mando, manera nos a cisa ta alrededor 400 persona nan a hinca den e aparato gubernamental, den un periodo di apenas 7 luna na mando, gobierno MEP-POR-RED a aumenta gasto di personal compara cu presupuesto 2017.
Un grupo cu ta consisti mas tanto di famia y amigonan, di candidatonan riba lista di e partidonan y campañadonan di e partidonan cu a wordo poni na trabou, mientras cu na mes momento ta papia di un situacion di crisis.
Hulanda ni CAFT a acepta esaki y den e caso aki nos por bisa cu gabinete Wever Croes na e momentonan aki tin un presupuesto 2018 cu ta bou tempo di “prueba” ya cu mester traha mesora riba un presupuesto supletorio caminda CAFT Y Hulanda kier mira un reduccion di 12 miyon den gasto di personal.
E momento a yega pa Prome Minister Wever Croes bira honesto cu su pueblo, informa pueblo di palabracionnan cu a wordo haci cu CAFT y sigur con e ta bay baha 12 miyon den gasto di personal ya cu e tin cuater pa cinco luna pa cumpli cu promesanan haci na Hulanda,” Parlamentario Marlon Sneek ta declara.
