E BALOR DI DIVERSIDAD

Bunita ta di mira cu awe, e amigo y amiganan ey di infancia, cu no a caba scol y bay studia, tog a logra di tin bon trabow y ta respeta den comunidad. Obviamente tin mas cu un caminda pa yega na un miho calidad di bida. Hopi di nan a cana un caminda mas largo y dificil. Nan a siña y a desaroya caracteristicanan y habilidadnan importante pa nan a yega unda nan ta. Caracteristicanan y habilidadnan manera traha duro, persistencia, siña di cada eror y nunca stop di purba y siña. Habilidadnan crusial pa exito den bida.

No lo ta bon pa nos sigura cu tur mucha siña e carcateristiconan y habilidadnan essencial aki? Y siña esakinan independiente di nan capacidad pa studia na scol of nan condicionnan material di bida?

Awendia muchanan tin internet, Google y YouTube y por siña y haña cualkier informacion cu nan ta desea direct riba nan computer of smartphone si nan tin. Practicamente tur scol tin e hermentnan digital aki tambe. Nan no tin nodo di bai bibliotheca natiocial. Technologia y desarollo di e infrastructura digital ta pone cu awe nos no tin excuus pa siña niun materia di scol. Cu e guia di un bon maestro of major, nan por haya casi tur conocemento y siña cualkier habilidad. Mirando cu nos ta den un !information age” caminda cu informacion ta jega serca nos manera un avalancha for di ora cu nos habri nos wowo, te ora pone nos cabez riba cushinchi. E reto no ta pa haya informacion. E reto ta pa sa cua informacion pa usa y con ta distingui e balor di cada pida informacion.

Si nos wak rond di nos na Aruba y den mundo, e retonan cu nos tin cu economia, medio ambiente y relacionnan entre hende of gruponan di hende, no ta falta di informacion of conocemento. E ta un falta di e abilidad di scucha otro, respeta otro, y sin prehuicio, accepta cu e otro persona por tin un idea, un punto di bista diferente y bon tambe. E ta e actitud di ta habr’i pa otro, di por compronde otro y e tolerancia di accepta otro cu no ta pensa mescos cu nos.

ENSEÑANSA PA FUTURO

Nos tin tur e informacion cu nos por kier na nos disposición, ki ora cu ta y unda cu nos ta. Nos por tin tur e conocemento necesario pa resolve practicamente tur reto den nos comunidad y rond di mundo. Pues nos tin un area pa pone mas atencion na dje den nos enseñansa cu no ta solamente pa desaroya nos IQ pa por gana placa. Esta e desaroyo di nos habilidad pa scucha y siña compronde otro cu no ta mescos cu nos. E ta e necesidad pa desaroya nos “inteligencia emocional (EQ)”, nos sentido di responsabilidad comun y nos capacidad pa haci cosnan hasta ora e ta pidi un esfuerso mas grandi of un sacrificio di nos mes. Ta e desaroyo emphatico, di nos sentido di responsabilidad comun y di nos curason, ta loke nos mester pone mas atencion na dje den enseñansa. Cu esey nos por desaroya hende, for di muchanan chiquito den bario y na scol, te cu e hefe of donjo di trabow, cu tin e conocemento, comprondemento, sabiduria, y e compassion. Aplicando esakinan den comunidad nos tur ta bay dilanti y gana atrobe. Asina nos lo yega na ta di berdad, !Aruba, One Happy Island”.

Gregory Bronswinkel e di tres parti lo keda publica pronto